Farg‘ona va O‘zbekiston tumanlarida noruda konlaridan chiqish yo‘llariga sun’iy intellektli kameralar o‘rnatilishi muhokama qilindi
2026-06-04 11:15:00 / Yangiliklar
Farg‘ona tumani hokimligi binosida hamda O‘zbekiston tumanida tashkil etilgan ushbu tadbirlarda yer qa’ridan foydali qazilmalar va noruda qimmatliklarni qazib olish hamda realizatsiya qilish jarayonida yashirin aylanmalarni qisqartirish masalalari diqqat markazida bo‘ldi. Loyihaga ko‘ra, mahalliy byudjet mablag‘lari hisobidan karyerlardan chiqadigan asosiy transport yo‘nalishlariga sun’iy intellekt texnologiyalariga asoslangan kuzatuv kameralari o‘rnatiladi.
Yig‘ilishda tadbirkorlarga Farg‘ona viloyati bo‘yicha noruda foydali qazilma joylashgan qazilmagohlardan chiqadigan yo‘llarga kuzatuv kameralarini o‘rnatish uchun mo‘ljallangan hududlarning sxema-xaritalari namoyish etildi va dasturning ishlash tartiblari batafsil tushuntirildi. Maxsus dasturiy ta’minot yuk avtomashinalarining rusumi, davlat raqami, yuk turi va hajmini hamda ularning harakatlanish yo‘nalishlarini real vaqt rejimida avtomatik aniqlash imkoniyatiga ega.
Ushbu raqamlashtirish choralari kon sanoatida nazorat mexanizmlarini mutlaqo yangi bosqichga olib chiqadi. Sun’iy intellekt yordamida yo‘lga qo‘yiladigan monitoring tizimi yuk hajmlarini to‘g‘ri deklaratsiya qilishni ta’minlaydi va davlat xazinasiga tushumlarning ko‘payishiga xizmat qiladi.
Amaliyotga tatbiq etilayotgan raqamli tizim noqonuniy qazib olish va yashirin savdo hajmini keskin kamaytirish orqali tadbirkorlar o‘rtasida sog‘lom raqobat muhitini shakllantiradi. Eng muhimi, hududiy infratuzilmani rivojlantirishga ajratiladigan mahalliy byudjet daromadlarining barqaror o‘sishi ta’minlanadi.