Kogon tumanida "Tibbiyot xodimlari kuni" munosabati bilan bayram tadbiri bo‘lib o‘tdi
2026-11-07 17:25:00 / Majlislar

Shu maqsadda bugun, tibbiyot xodimlari kuni munosabati bilan Kogon tumanidagi “Durdona” tantanalar saroyida soha vakillarini qutlashga bag‘ishlangan tantanali tadbir bo‘lib o‘tdi. Unda tumandagi davolash-profilaktika muassasalari rahbarlari va xodimlari ishtirok etdi.
Tadbir davomida Kogon tumani hokimi Otabek Qazoqov soha vakillarini kasb bayrami bilan samimiy muborakbod etib, ularning inson salomatligini asrash, aholiga sifatli tibbiy xizmat ko‘rsatish yo‘lidagi mas’uliyatli va fidokorona mehnatlarini alohida e’tirof etdi.
Ta’kidlanganidek, Prezidentimiz tashabbusi bilan so‘nggi yillarda mamlakatimiz sog‘liqni saqlash tizimida keng ko‘lamli islohotlar amalga oshirilmoqda. Inson manfaatlarini ta’minlash, fuqarolar salomatligini mustahkamlash, tibbiy xizmat sifati va samaradorligini oshirish davlat siyosatining ustuvor yo‘nalishlaridan biri sifatida belgilangan.
Ushbu islohotlar doirasida Kogon tumanida ham sog‘liqni saqlash tizimini tubdan takomillashtirish, tibbiy xizmatni yangi bosqichga olib chiqish borasida izchil ishlar olib borilmoqda. Jumladan, bir qator oilaviy shifokorlik punktlari rekonstruksiya qilinib, zamonaviy talablar asosida qayta jihozlandi.
Shu bilan birga, tumandagi tibbiyot infratuzilmasini rivojlantirish, 1 ming 200 nafardan ortiq soha xodimlarining mehnat sharoitlarini yaxshilash, ularning kasbiy salohiyatini oshirish va jamiyatdagi nufuzini mustahkamlashga ham alohida e’tibor qaratilmoqda.
Tantanali marosimda qishloq va mahallalarda aholiga xizmat ko‘rsatayotgan oilaviy shifokorlar, tez tibbiy yordam xodimlari, jarrohlar, pediatrlar, hamshiralar, farmatsevtlar hamda tibbiyot tizimining boshqa barcha mutaxassislariga samimiy minnatdorlik bildirildi.
Bayram munosabati bilan sog‘liqni saqlash tizimida ko‘p yillardan buyon samarali faoliyat yuritib, aholiga sifatli tibbiy xizmat ko‘rsatish, sohani rivojlantirish va amalga oshirilayotgan islohotlar ijrosiga munosib hissa qo‘shib kelayotgan bir guruh tibbiyot xodimlari tuman hokimining tashakkurnomalari hamda esdalik sovg‘alari bilan taqdirlandilar. Ularning fidoyiligi, kasbiy mahorati, tashabbuskorligi va yuksak insoniy fazilatlari hamkasblari uchun munosib namuna ekani alohida ta’kidlandi.
Bayram tadbiri ko‘tarinki kayfiyat va samimiy ruhda davom etdi. Kasb bayramini nishonlayotgan tibbiyot xodimlari uchun bayram dasturxoni yozilib, tuman madaniyat bo‘limi xushovoz xonandalarining chiqishlari, dilrabo kuy-qo‘shiqlar yig‘ilganlarga bayramona kayfiyat ulashdi.
Tadbir tibbiyot xodimlariga bo‘lgan yuksak hurmat va ehtirom, ularning mashaqqatli hamda sharafli mehnatiga bildirilgan samimiy minnatdorlik ifodasi bo‘ldi.









