"Kogon" mahallasida ijtimoiy soha obyektlari ko'rkam qiyofa kasb etib, hudud infratuzilmasi tubdan yaxshilanmoqda
2026-10-08 10:50:00 / Rahbariyatning bayonotlari va nutqlari

Xususan, O‘zbekiston Respublikasi Prezidentining 2021-yil 18-sentabrdagi “Islom taraqqiyot banki” va OPEK xalqaro taraqqiyot jamg‘armasi ishtirokida qishloq joylarni barqaror rivojlantirish loyihasini amalga oshirish chora-tadbirlari to‘g‘risida”gi qarori asosida mahallada muhim infratuzilma loyihalari hayotga tatbiq etildi.
Jumladan, 8 kilometrdan ortiq ichki yo‘llar asfaltlashtirilib, 69 dona muqobil energiya manbalari asosida ishlaydigan zamonaviy LED yoritish moslamalari o‘rnatildi. Shuningdek, aholini toza ichimlik suvi bilan ta’minlash maqsadida qariyb 9 kilometr uzunlikdagi ichimlik suvi tarmog‘i tortildi. Hududdagi “Sultonobod” arig‘ining 2,4 kilometrlik qismi betonlashtirilib, suvdan samarali foydalanish va infratuzilma holatini yaxshilashga alohida e’tibor qaratildi.
Bundan tashqari, mahalladagi ijtimoiy soha obyektlarini zamonaviylashtirish, aholiga sifatli ta’lim va tibbiy xizmatlar ko‘rsatish imkoniyatlarini kengaytirish maqsadida 10-sonli umumta’lim maktabi hamda 26-sonli oilaviy poliklinika qayta bunyod etilib, bugungi kunda zamonaviy va ko‘rkam qiyofaga ega bo‘ldi. Ta'kidlash joizki, mazkur bunyodkorlik va obodonlashtirish ishlari, avvalo, aholi farovonligini oshirish, yashash uchun qulay sharoit yaratish hamda mahallaning ijtimoiy-iqtisodiy salohiyatini yuksaltirishga xizmat qilmoqda.
Albatta, ushbu natijalarga erishishda mahalladagi “Mahalla yettiligi” a’zolarining o‘zaro hamjihatligi, samarali hamkorligi va aholi bilan yaqindan ishlashi muhim ahamiyat kasb etmoqda. Zero, “Mahalla yettiligi” bugungi kunda aholi muammolarini joyida aniqlash va tezkor hal etish, fuqarolarning murojaatlari bilan manzilli ishlash hamda davlat va xalq o‘rtasidagi mustahkam ko‘prik vazifasini bajarishda muhim o‘rin tutmoqda.
Eng muhimi, “Mahalla yettiligi” a’zolarining birgalikdagi sa’y-harakatlari natijasida aholi muammolariga yechim topish, fuqarolarni qo‘llab-quvvatlash va mahallada amalga oshirilayotgan islohotlarning samaradorligini oshirishga erishilmoqda. Zero, aholi roziligi va farovonligi yo‘lida olib borilayotgan har bir ezgu ish, avvalo, hamjihatlik, fidoyilik va xalq dardiga hamdard bo‘lishdan boshlanadi.





