Buxoro viloyati Kogon tumani hokimligi

Bugungi kunda mamlakatimizda barcha sohalar qatori huquqni muhofaza qilish organlari faoliyati samaradorligini oshirish, tizim faoliyatini mutlaqo yangi, zamonaviy bosqichga ko‘tarish, soha xodimlarining aholining turli qatlamlari bilan doimiy muloqoti va hamkorligini yanada mustahkamlash borasida ham ulkan ishlar amalga oshirilmoqda. Bundan ko‘zlangan maqsad — prokuratura organlarini ushbu tizimda xizmat qilayotgan har bir xodim jamiyatimizda tinchlik va osoyishtalikni, jamoat tartibini saqlash yo‘lida chin dildan xizmat qiladigan xalqchil, professional tuzilmaga aylantirishdan iborat.

Yangi O‘zbekistonda “Inson qadri uchun” ezgu g‘oyasi davlatimiz siyosatining ustuvor yo‘nalishiga aylandi. Inson qadri ulug‘lanayotgan ana shunday tarixiy sharoitda qishloq, guzar va mahallalarimizda tinchlik va osoyishtalikni ta’minlash borasida barchamizning zimmamizdagi mas’uliyatli vazifalar yanada ortib bormoqda.

Davlatimiz rahbari ham “Davlat va xalq tayanadigan asosiy ustun — qonun, uning kuchini amalda namoyon etadigan eng samarali tizim esa prokuratura organlari”, deya tizimga alohida e’tibor qaratib, bu sohadagi o‘zgarishlarning eng katta zamini — yurtimizdagi tinchlik-osoyishtalik ekanligini qayta-qayta uqtirib kelmoqdalar.

Joriy yilning o‘tgan 9 oyi davomida Kogon tumani hududida tuman prokuraturasi tomonidan tinchlik va osoyishtalikni ta’minlash, jinoyatlarning oldini olish hamda sodir etilgan jinoyatlarni tez fosh etish maqsadida tuman hokimligi va jamoatchilik bilan hamkorlikda tizimli chora-tadbirlar amalga oshirilmoqda. Shu jumladan, “Xavfsiz va sog‘lom yurt”, “Tun”, “Xavfsiz hudud”, “Nazorat”, “Turmush”, “Davomat”, “Qidiruv”, “Tong”, “Payshanba — Yoshlar kuni” va boshqa bir qator tezkor-profilaktik tadbirlar o‘tkazildi.

Mazkur tezkor-profilaktik tadbirlar natijasida joriy yilning o‘tgan 9 oyi davomida tumanda 141 ta jinoyat qayd etilib, o‘tgan 2025-yilning shu davriga nisbatan 19 taga (122/141) yoki 15,6 foizga oshgan.

Jami jinoyatlarning 51 tasini (36,1 foiz) oldi olinishi lozim bo‘lgan, 83 tasini (58,8 foiz) aniqlanadigan hamda 7 tasini (4,9 foiz) axborot texnologiyalari orqali sodir etilgan jinoyatlar tashkil qiladi.

Joriy yilning o‘tgan 9 oyida o‘g‘rilik 25 foizga (15/20), og‘ir tan jarohati yetkazish 100 foizga (0/1), nomusga tegish 100 foizga (0/2), yengil tan jarohati yetkazish 50 foizga (1/2), 16 yoshga to‘lmagan shaxs bilan jinsiy munosabatga kirishish jinoyatlari 100,0 foizga (0/1) hamda transport vositasini olib qochish 100 foizga (0/1) ko‘paygani o‘ta ayanchli holat.

2026-yilning 9 oyida jami sodir etilgan 141 ta jinoyatdan 51 tasi mahallada oldi olinishi mumkin bo‘lgan jinoyatlarni tashkil qilib, tuman hududidagi 23 ta mahalladan 4 tasi “qizil”, 13 tasi “sariq” va 6 tasi “yashil” toifaga ajratildi.

Kibermakonda sodir etilayotgan jinoyatlar soni hozirgi kunda global muammolardan biri hisoblanadi.

Bundan buyon asosiy e’tiborni sodir etilgan jinoyat va huquqbuzarliklarning asl sabablarini aniqlash va bartaraf etish masalasiga qaratamiz. Kelgusida har bir mahallada huquqbuzarlik va jinoyatchilikning asl sabablari aniqlanib, ularni bartaraf etish choralari ko‘riladi.

Dunyo miqyosida axborot texnologiyalarining rivojlanishi, XXI asr — axborot texnologiyalari asri bo‘lganligi insonlarga qanchalik qulaylik yaratgan bo‘lsa, shunchalik ularning hayoti va shaxsiy ma’lumotlari xavfsizligining kamayishiga ham olib keldi. Insonlar o‘rtasida elektron pullardan foydalanish qanchalik qulayligi ortgan bo‘lsa, ularga nisbatan hujumlar ham shu darajada ortdi. Aynan ushbu sohalardagi xavfsizlik “kiberxavfsizlik” bilan ta’minlanadi.

Kibermakondagi jinoyatlarning boshqa jinoyatlardan farqi shundaki, bu jinoyatni shaxs masofadan turib sodir etadi, inson bu jinoyatni o‘z ko‘zi bilan ko‘rmaydi, ushbu jinoyatda inson hayotiga emas, balki ma’lumotlariga hujum qilinadi. Shu sababli bunday jinoyatlarga qarshi kurashish uchun mamlakatda samarali faoliyat yurituvchi organlar tizimini yaratish taqozo etiladi.

Hozirgi kunda fuqarolar tomonidan kelib tushayotgan murojaatlarni o‘rganib chiqilganda, fuqarolar Telegram ilovasi orqali kelgan “sudga chaqiruv xati.apk” hamda “bu sening fotosuratlaring.apk” nomli zararli ilovalarni o‘z telefon qurilmalariga yuklab olganligi sababli plastik kartalaridagi pul mablag‘lari yechib ketilayotgani, shuningdek, “uyda o‘tirib treyding orqali oson pul topishingiz mumkin” mazmunidagi turli yolg‘on xabarlarga ishonib, o‘zlari pul mablag‘larini firibgarlarga berib, aldanib qolayotganliklari sabab bo‘lmoqda.

Shu bois, har bir fuqaro o‘zini va yaqinlarini kiberfiribgarlik va raqamli tahdidlardan himoya qila olishi uchun quyidagi asosiy tavsiyalarni yodda tutishi zarur.

Kiberjinoyatlardan himoyalanishda sizning hushyorligingiz va ogohligingiz juda muhimdir.

Bugungi kunga kelib, kiberfiribgarlar ijtimoiy tarmoqlar orqali fuqarolarni ishontirish yo‘li bilan turli xil mol-mulklarini qo‘lga kiritmoqdalar.

Huquq-tartibot idoralari tomonidan kiberjinoyatlarga qarshi kurashish, ularni “issiq izidan” fosh etish va fuqarolarning kiber savodxonligini oshirish bo‘yicha doimiy ravishda chora-tadbirlar amalga oshirilayotganiga qaramasdan, fuqarolarimiz tomonidan kelib tushayotgan murojaatlar soni yuqoriligicha qolmoqda.

Shuningdek, Prezidentimizning 2025-yil 30-apreldagi PQ-153-son qarori bilan “Axborot texnologiyalari yordamida sodir etiladigan jinoyatlarga qarshi kurashish faoliyatini kuchaytirish chora-tadbirlari to‘g‘risida”gi hujjat qabul qilinib, mamlakatimizda kiberxavfsizlikni ta’minlashning normativ-huquqiy, tashkiliy va profilaktik asoslari mustahkamlandi.

Kiberjinoyatlardan jabrlanib qolmaslik uchun doimiy ravishda pul evaziga nomingizga bank plastik kartasi ochib berish, shuningdek, firibgarlar tomonidan taklif qilinayotgan arzon narxdagi mol-mulklarni sotish bahonasida plastik kartalar orqali pul mablag‘larini o‘zlashtirib olish holatlaridan ehtiyot bo‘ling.

Yaqin tanishlaringizning akkauntidan “sudga chaqiruv xati”, “sening rasmlaring”, “to‘yga taklifnoma” kabi boshqa nomlar ostida kelayotgan zararli APK ilovalari va shubhali havolalar ustiga bosmang hamda ularni mobil qurilmangizga o‘rnatmang.

“Bank xodimi” niqobi ostida qo‘ng‘iroq qilib, kredit, fond mablag‘i yoki pensiya tayinlash bahonasida shaxsiy ma’lumotlaringizni so‘rashlari mumkin. Unutmang: hech qachon pasport raqamingiz, karta ma’lumotlaringiz yoki suratlaringizni notanish shaxslarga yubormang.

Ijtimoiy tarmoqlardagi kanal va guruhlarda qisqa muddatda pulingizni bir necha barobarga ko‘paytirib berishni va’da qilayotgan, o‘zini soxta treyder, biznesmen, bukmeker va boshqa soha vakili sifatida tanishtirayotgan firibgarlarga ishonib qolmang.

Onlayn savdo platformalarida bahosi o‘z narxidan ancha arzon qilib ko‘rsatilgan buyumlarni xarid qilishga shoshilmang. Ijtimoiy tarmoqlarda katta miqdordagi oylik maosh evaziga onlayn ish taklif qilayotgan shaxslar aldoviga uchib, shaxsingizni tasdiqlovchi hujjatlarni begona shaxslarga yubormang.

Aziz vatandoshlar!

Barchangizni jinoyatlarning oldini olish va ularni bartaraf etishda faol hamkorlikka chaqiramiz.

Agar Sizda fuqarolar, jamiyat va davlat xavfsizligiga turli xatarlar bo‘yicha, shuningdek, boshqa shaxslar tomonidan sodir etilayotgan huquqbuzarliklar va jinoyatlar haqida ma’lumotlar bo‘lsa, bizga “1007” qisqa raqami orqali yoki eng yaqin prokuratura organlariga xabar berishingizni so‘raymiz.

Albatta, xabar berganlarning shaxsiga doir ma’lumotlar sir saqlanishiga kafolat beramiz. Shuni e’tiborga olingki, bu — davlat va jamiyat oldidagi o‘z burchiga sodiqlik hisoblanadi. Sizning shu xabaringiz orqali og‘ir oqibatli jinoyatlarning oldi olinishi, insonlar hayoti saqlab qolinishi mumkinligini aslo unutmang. Hech birimiz befarqlikka berilmasligimiz lozim.

Hurmatli fuqarolar!

Yana bir bor ta’kidlayman: jinoyatning har qanday ko‘rinishiga zudlik bilan munosabat bildirib, jinoyat sodir etgan shaxslarga nisbatan jazoning muqarrarligiga shaxsan kafolat beraman.

E’tiboringiz uchun rahmat!