25-sonli oilaviy poliklinika yangicha ko‘rinishda aholiga xizmat ko‘rsatmoqda
2026-07-21 13:25:00 / Yangiliklar
“Bahouddin Naqshband” mahalla fuqarolar yig‘ini Kogon tumanidagi yirik, aholi gavjum yashaydigan mahallalardan biri hisoblanadi. Ayni kunda mahalladagi 1 ming 78 ta oila tarkibida 5 mingdan ziyod aholi vakili umrguzaronlik qilib kelmoqda.
Hududda o‘ndan ziyod ko‘cha bo‘lib, jumladan, 2 ta umumta’lim maktabi, 1 ta davlat maktabgacha ta’lim tashkiloti, 8 ta oilaviy bolalar bog‘chasi, qator korxona va tashkilot, o‘nlab tadbirkorlik sub’ekti faoliyat ko‘rsatmoqda.
Ayni kunda mahallada amalga oshirilayotgan obodonlashtirish, ta’mirlash-tiklash ishlari havas qilgulik. Ijtimoiy reestrga kiritilgan fuqarolarni o‘rganish, aholining tadbirkorlik tashabbuslarini qo‘llab-quvvatlab, kredit va subsidiyalar ajratilishida ko‘maklashish, doimiy daromad manbaiga ega bo‘lmagan ishsiz aholini kasb-hunar va tadbirkorlikka o‘qitish, bandligini ta’minlash choralari ko‘rilmoqda. Mahallada mavjud infratuzilmani modernizatsiya qilish, zamonaviy muhandislik-kommunikatsiya tarmoqlarini barpo etish va mavjudlarini rekonstruksiya qilish borasida muhim loyihalar hayotga tatbiq etilmoqda.
Ayni kunda hududdagi 25-sonli oilaviy poliklinikasi tibbiyot xodimlari Bahouddin Naqshband mahallasi va uning atrofidagi jami 21 ta qishloqning 12 mingdan ortiq aholisiga tibbiy-profilaktik xizmat ko‘rsatmoqda.
—Hashar yo‘li bilan 2004 yilda qurib foydalanishga topshirilgan tibbiyot poliklinikamiz keyingi paytda ta’mirtalab ahvolga kelgani bois, so‘nggi 3 oyda mukammal ta’mirdan chiqarilib, talab darajasidagi zamonaviy binoga ega bo‘ldik. Zarur tibbiy uskunalar, UZI apparati bilan ham jihozlandi,—deydi poliklinikaning katta tajribaga ega umumiy amaliyot shifokori Nodira Rabieva.—Endilikda muassasada mehnat qilayotgan 6 nafar umumiy amaliyot vrachi, akusher-ginekolog va UZI vrachi hamda ularga yaqindan ko‘maklashayotgan 20 nafar hamshiraga munosib mehnat sharoiti yaratilganidan juda xursandmiz.
Zamonaviy qiyofaga ega bo‘lgan, muqobil energiya manbai—quyosh panneli bilan ta’minlangan oilaviy poliklinika bugunga kelib hudud aholisiga beminnat tibbiy-profilaktik xizmat qilmoqda.
Shuningdek, muassasa to‘liq “Davlat tibbiy xizmatlari raqamlashtirish tizimi”ga ulangan bo‘lib, salomatligiga befarq bo‘lmagan aholi vakillari ovoragarchiliklarsiz, tez va bepul xizmatga ega bo‘lishmoqda.