Buxoro viloyati Kogon tumani hokimligi

Mazkur tanlovda tuman Maktabgacha va maktab ta’limi bo‘limi mas’ul xodimlari, hakamlar hay’ati a’zolari hamda davlat maktabgacha ta’lim tashkilotlari direktorlari ishtirok etdi.

Ko‘rik-tanlov quyidagi shartlar asosida tashkil etildi:
🔹 Portfolio taqdimoti – ishtirokchilarning mehnat faoliyati, erishgan yutuqlari, ta’lim sifati va tarbiyaviy ishlar samaradorligini aks ettiruvchi materiallar taqdim etildi.
🔹 Boshqaruv loyihasi taqdimoti – maktabgacha ta’lim tashkilotini rivojlantirishga qaratilgan istiqbolli g‘oyalar, innovatsion boshqaruv yechimlari hamda ta’lim-tarbiya jarayonini takomillashtirish bo‘yicha ishlab chiqilgan loyihalar himoya qilindi.
🔹 Rahbarlik mahorati – ishtirokchilarning boshqaruv madaniyati, jamoa bilan ishlash ko‘nikmalari, muammoli vaziyatlarda to‘g‘ri qaror qabul qilish qobiliyati hamda rahbar sifatidagi kasbiy kompetensiyalari baholandi.

Hakamlar hay’ati tomonidan ishtirokchilarning har bir chiqishi belgilangan mezonlar asosida xolis va shaffof tarzda baholandi. Yakuniy natijalarga ko‘ra, yuqori natijalarni qayd etgan direktorlar tanlovning tuman bosqichi g‘oliblari deb e’tirof etilib, ko‘rik-tanlovning keyingi bosqichida ishtirok etish huquqini qo‘lga kiritdilar.