Buxoro viloyati Kogon tumani hokimligi

“Avvalo, mamlakatimizda xotin-qizlarning tadbirkorlik faoliyati bilan shug‘ullanishi, o‘z biznesini yo‘lga qo‘yishi va iqtisodiy jihatdan mustaqil bo‘lishi uchun yaratilayotgan keng imkoniyatlar va berilayotgan e’tibor uchun Hukumatimizga o‘z minnatdorchiligimni bildiraman”, — deydi Nazokat Haydarova. 

U 2023-yilda o‘z faoliyatini xonadonida yakka tartibda turli shirinliklar tayyorlashdan boshlagan. O‘z ustida muntazam ishlashi, mahsulot sifati va mijozlar ishonchini qozonishga bo‘lgan intilishi natijasida qisqa vaqt ichida faoliyatini sezilarli darajada kengaytirishga muvaffaq bo‘ldi.

Bugungi kunda tadbirkor “Nazokat pishiriqlari” brendi ostida 10 turdan ortiq shirinlik va qandolat mahsulotlarini ishlab chiqarib, xaridorlarga taqdim etmoqda. Mahsulotlarning sifati, ta’mi va tabiiyligi tufayli ularning xaridorlari soni tobora ortib bormoqda.

Nazokat Haydarovaning ishbilarmonlik faoliyati nafaqat o‘z oilasi farovonligini ta’minlashga, balki mahalladagi xotin-qizlarning bandligini oshirishga ham xizmat qilmoqda. Hozirgi kunda u 5 nafar xotin-qizni doimiy ish bilan ta’minlagan. Shu bilan birga, pazandachilik va qandolatchilik sohasiga qiziqadigan yosh qizlarga o‘z tajribasi va kasb sirlarini beminnat o‘rgatib, ularning kelgusida mustaqil faoliyat boshlashlariga ko‘maklashib kelmoqda.

Ayni paytda mo‘jaz sexda samarali ishlab chiqarish yo‘lga qo‘yilgan bo‘lib, faoliyat natijasida har oy o‘rtacha 12 million so‘mga yaqin daromad olinmoqda. Bu esa tadbirkorning mehnatsevarligi, izlanuvchanligi va yaratilgan imkoniyatlardan oqilona foydalanayotganining amaliy natijasidir.

Nazokat Haydarovaning faoliyati xotin-qizlarni tadbirkorlikka keng jalb etish, ularning bandligini ta’minlash va oilalar daromadini oshirish borasida olib borilayotgan islohotlarning amaliy ifodasi bo‘lib, mahallada boshqa xotin-qizlar uchun ham munosib namuna vazifasini o‘tamoqda.