Buxoro viloyati Kogon tumani hokimligi

U o‘z faoliyatini dastlab xonadonida oddiy sharoitda, yakka tartibda boshlagan. Hunariga bo‘lgan qiziqish va intilish uni izchil mehnat qilishga undadi. Keyinchalik, davlat tomonidan tadbirkorlikni qo‘llab-quvvatlash maqsadida yaratilgan imkoniyatlardan, xususan hokim yordamchisi ko‘magida ajratilgan imtiyozli kredit mablag‘laridan samarali foydalanib, 2025-yilda o‘z faoliyatini yangi bosqichga olib chiqdi. Ushbu mablag‘lar evaziga zamonaviy va zarur texnik jihozlar xarid qilinib, kichik hajmdagi, ammo samarali faoliyat yurituvchi ishlab chiqarish sexi tashkil etildi.

Bugungi kunda ushbu sexda metallga ishlov berib turli xil mahsulotlar ishlab chiqarilmoqda. Jumladan, turar-joylar va tashkilotlar uchun mustahkam darvozalar, temir panjaralar, shuningdek qurilish sohasida keng qo‘llaniladigan qoliplar tayyorlanmoqda. Mahsulotlarning sifatli va talab darajasida bo‘lishi natijasida mijozlar safi tobora kengayib, nafaqat mahalla aholisi, balki uzoq hududlardan ham buyurtmalar kelib tushmoqda.

Sunnat Axmedov nafaqat tadbirkor sifatida faoliyat yuritmoqda, balki ijtimoiy mas’uliyatni ham chuqur his etgan holda, mahalladoshlarini ish bilan ta’minlashga alohida e’tibor qaratmoqda. Hozirgi kunda u 3 nafar fuqaroni doimiy ish o‘rni bilan ta’minlagan bo‘lsa, 10 ga yaqin yoshlarni o‘z yoniga jalb etib, ularga metallga ishlov berish sir-asrorlarini o‘rgatib kelmoqda. Bu esa yoshlarning kasb-hunar egallashi, bandligini ta’minlash hamda kelgusida mustaqil faoliyat boshlashlari uchun muhim zamin yaratmoqda.

Tadbirkorning ta’kidlashicha, yaratilayotgan imkoniyatlardan to‘g‘ri va samarali foydalanish, tinimsiz mehnat qilish orqali yaxshi natijalarga erishish mumkin. Bugungi kunda uning yillik daromadi 100 million so‘mdan ortiqni tashkil etib, bu o‘z navbatida oila farovonligini oshirish, xonadonning kam-ko‘stini to‘ldirish hamda faoliyatni yanada kengaytirish uchun mustahkam asos bo‘lib xizmat qilmoqda.