Buxoro viloyati Kogon tumani hokimligi

Umumiy maydoni 3 gektarni tashkil etuvchi mazkur issiqxona majmuasida bugungi kunda yuqori hosildor va eksportbop qishloq xo‘jaligi ekinlari yetishtirilmoqda. Jumladan, pomidorning “Alamino” hamda bodringning “Milena” navlari zamonaviy agrotexnologiyalar asosida parvarishlanib, agrotexnik tadbirlarning to‘liq va sifatli bajarilishi natijasida yuqori hosildorlikka erishilmoqda. Mavsum yakuniga qadar 120 tonna pomidor va 100 tonna bodring hosilini yig‘ib olish rejalashtirilgan bo‘lib, ushbu mahsulotlar ichki iste’mol bozorini to‘ldirish bilan bir qatorda eksportga yo‘naltirilishi ham ko‘zda tutilgan.

Mazkur issiqxona xo'jaligida joriy etilgan ilg‘or texnologiyalar, jumladan, tomchilatib sug‘orish tizimi, iqlim nazorati, resurs tejamkor usullar hamda yuqori sifatli urug‘liklardan foydalanish mahsulot sifatini oshirish, ishlab chiqarish samaradorligini ta’minlash va yil davomida uzluksiz hosil yetishtirish imkonini bermoqda. Bu esa, o‘z navbatida, tumanda oziq-ovqat mahsulotlari barqarorligini ta’minlash, narx-navoning muvozanatini saqlash va aholining sifatli mahsulotlarga bo‘lgan ehtiyojini qondirishda muhim omil bo‘lib xizmat qilmoqda.

Shu bilan birga, loyiha doirasida aholi bandligini ta’minlash masalasiga alohida e’tibor qaratilgan. Hozirgi kunda issiqxonada 30 nafarga yaqin ishchi, asosan yoshlar va xotin-qizlar doimiy ish o‘rinlari bilan ta’minlangan. Bu esa hududda ishsizlik darajasini kamaytirish, aholining daromad manbalarini kengaytirish hamda ijtimoiy-iqtisodiy barqarorlikni mustahkamlashga xizmat qilmoqda.

Hozirgi kunda xo‘jalik tomonidan issiqxona maydonlarini kengaytirish, ishlab chiqarish hajmini oshirish hamda qo‘shimcha ish o‘rinlarini yaratish yuzasidan rejalar qilinmoqda. Kelgusida ushbu loyihaning yanada kengaytirilishi orqali yangi ish o‘rinlari tashkil etilishi, eksport hajmining ortishi va hudud iqtisodiyoti rivojiga  hissa qo'shishi kutilmoqda.