Buxoro viloyati Kogon tumani hokimligi

Mazkur yo‘nalishda tumanda jami 674 gektar maydonda kartoshka ekish rejalashtirilgan bo‘lib, bugungi kunda tomorqa va dehqon xo‘jaliklari, shuningdek fermer xo‘jaliklarida agrotexnik tadbirlar yuqori saviyada va uyushqoqlik bilan olib borilmoqda.

Jumladan, tumandagi qariyb 160 ta fermer xo‘jaliklari tomonidan 300 gektardan ortiq ochiq maydonlarda kartoshka yetishtirish yo'lga qo'yilmoqda. Shu bilan birga, dehqon xo‘jaliklari tomonidan 374 gektar maydonda kartoshka ekilishi rejalashtirilgan bo‘lib, bu orqali hududda qishloq xo‘jaligi mahsulotlari ishlab chiqarish hajmini sezilarli darajada oshirish ko‘zda tutilgan.

Bundan tashqari, yer resurslaridan samarali foydalanish maqsadida dala chetlari, bog‘ va tokzorlar oralig‘ida sabzavot, poliz va dukkakli ekinlarni joylashtirish ishlari ham amalga oshirilmoqda. Bu esa nafaqat yerlarning samaradorligini oshirish, balki qo‘shimcha hosil olish imkonini ham yaratmoqda.

Ayni paytda ekin jarayonlari izchil davom ettirilmoqda. Xususan, “Kogon Axtam Aslbek” fermer xo‘jaligida 1 gektar, “Bog‘i Sarayon” MCHJda 4 gektar hamda “Baraka Safo” fermer xo‘jaligida 2 gektar maydonda kartoshka urug‘lari qadab bo‘lingan bo‘lib, ushbu xo‘jaliklarda erta hosil olish uchun barcha zarur agrotexnik choralar ko‘rilmoqda.

Umuman olganda, tumanda talabgir qishloq xo'jaligi mahsulotlari ishlab chiqarish hajmini oshirish orqali hudud aholisining asosiy oziq-ovqat mahsulotlariga bo‘lgan ehtiyojini qondirish, narx-navoning asossiz oshib ketishining oldini olish, shuningdek ichki bozorda mahsulotlar barqarorligini ta’minlashga erishiladi.