Kogon tumanida Xitoy Xalq Respublikasi investorlari tomonidan 5 ming gektar yer o‘zlashtirilishi rejalashtirilmoqda
2026-02-10 19:50:00 / Yangiliklar
Ana shunday istiqbolli loyihalardan biri Kogon tumanida amalga oshirilishi rejalashtirilmoqda. Jumladan, Kogon tumani hokimi Otabek Qazoqov Xitoy Xalq Respublikasidan tashrif buyurgan, investor Qi Hongwei boshchiligidagi delegatsiya bilan rasmiy uchrashuv o‘tkazdi.
Uchrashuv davomida xitoylik investorlar tomonidan Kogon tumanidagi hozirda foydalanilmayotgan bo‘z yer maydonlarini o‘zlashtirish bo‘yicha aniq takliflar bildirildi. Taklifga ko‘ra, loyiha dastlabki bosqichida cho‘l zonasidan 5 ming gektar yer maydoni ajratilishi rejalashtirilgan bo‘lib, mazkur hududda zamonaviy tomchilatib sug‘orish texnologiyalarini joriy etgan holda yuqori sifatli urug‘lik chigit ekish va paxta yetishtirish loyihasini amalga oshirish ko‘zda tutilmoqda.
Investorlar loyiha samaradorligini ta’minlash maqsadida zarur bo‘ladigan muhandislik-kommunikatsiya infratuzilmasi, suv ta’minoti, logistika imkoniyatlari hamda hududda yaratilishi mumkin bo‘lgan qo‘shimcha sharoitlar bilan ham yaqindan qiziqish bildirishdi.
O‘z navbatida, tuman hokimi Otabek Qazoqov mehmonlarga mamlakatimizda xorijiy investorlar uchun yaratilgan qulay investitsiya muhiti, berilayotgan imtiyoz va kafolatlar, shuningdek, Kogon tumanining iqtisodiy salohiyati, ishlab chiqarish infratuzilmasi va qishloq xo‘jaligi sohasida yirik loyihalarni amalga oshirish uchun mavjud imkoniyatlar haqida batafsil ma’lumot berdi.
Uchrashuv yakunida tomonlar o‘zaro manfaatli hamkorlikni yo‘lga qo‘yish, loyihani bosqichma-bosqich amalga oshirish hamda kelgusida hamkorlik ko‘lamini kengaytirish bo‘yicha kelishuvga erishdilar.