Buxoro viloyati Kogon tumani hokimligi

Shuningdek, davlatimiz rahbari raisligida joriy yilning 27-yanvar kuni oʻtkazilgan yigʻilishda uyushgan jinoyatchilik, narkojinoyatlar va kiberjinoyatlarga qarshi kurashish, yashirin iqtisodiyot boʻyicha taʼsirchan choralarni belgilash borasida qator vazifalar belgilandi. Prezidentimizning topshirigʻi asosida boʻlinmalar uchun xizmatni oʻtash, muomala madaniyati, tezkor harakatlanish, kuch va qurol ishlatish boʻyicha yagona standartlar joriy etilib, servis tuzilmasiga aylanishi koʻrsatib oʻtildi.
 

Rahbarlar zimmasiga ichki ishlar tizimida faoliyat yuritayotgan malakali va fidoyi kadrlarni ragʻbatlantirish, ular uchun munosib mehnat sharoitlarini yaratish vazifasi topshirildi.
 

Hech shubhasiz, ichki ishlar organlari tizimida faoliyat yuritayotgan xodimlar uchun munosib mehnat sharoitlarini yaratib berish orqali ularning zimmasiga yuklatilgan vazifalarni sifatli va vijdonan bajarishiga erishiladi.
 

Bu borada viloyatimizda ham bir qator ijobiy ishlar amalga oshirib kelinmoqda. Xususan, oʻtgan yilda ichki ishlar xodimlariga zamonaviy sharoitlarni yaratib berish, ularni ijtimoiy qoʻllab-quvvatlash tadbirlariga viloyat mahalliy byudjetidan 32 mlrd. soʻmdan ortiq mablagʻ yoʻnaltirildi. Ichki ishlar vazirligi Buxoro akademik litseyi, Ichki ishlar boshqarmasi Tibbiyot boʻlimi, Probatsiya xizmati binolarida qurilish-taʼmirlash ishlari amalga oshirildi.
 

Bugun esa Kogon tumani ichki ishlar boʻlimining yangilangan, koʻrkam va zamonaviy binosi foydalanishga topshirildi. 

Shu munosabat bilan tashkil etilgan tantanali marosimda viloyat hokimi Botir Zaripov, viloyatdagi huquqni muhofaza qiluvchi idoralar rahbarlari, ichki ishlar boshqarmasi boshligʻi, polkovnik Ikromjon Tursunov, viloyat prokurori Ulugʻbek Hamdamov, tuman IIB shaxsiy tarkibi, tuman faollari, ichki ishlar faxriylari va boshqa jamoat tashkilotlari vakillari qatnashdi. 
 

Tadbirda soʻzga chiqqan viloyat hokimi, harbiy-maʼmuriy sektor rahbari Botir Zaripov  tuman ichki ishlar boʻlimi shaxsiy tarkibini yangi bino bilan tabriklab, ichki ishlar tizimida amalga oshirilayotgan islohotlar tufayli aholining tinchlik va xavfsizligini taʼminlashda, fuqarolarning huquqlarini ishonchli himoya qilishning izchil tizimi yaratilganligini alohida taʼkidladi.
 

Ikki qavatli yangi zamonaviy inshootda huquq-tartibot posbonlari samarali faoliyat koʻrsatishlari uchun barcha qulayliklar mavjud. 

Binoda maʼrifat xonasi, maxsus tergov majmuasi, tuman markazidagi videokuzatuv kameralariga ulangan sitiuatsion markaz, yotoqxona, oshxona faoliyati yoʻlga qoʻyilgan. Patrul-post xizmati, yoʻl harakati xavfsizligi va boshqa tezkor qismlar boʻlimning geoinformatsion tizimi orqali boshqaradi. 
 

Shuningdek, aholi eng koʻp murojaat qiladigan migratsiya va fuqarolikni rasmiylashtirish, yoʻl harakati xavfsizligi boʻlimlari umumiy binodan alohida joylashgan boʻlib, ularda ham fuqarolar uchun qator qulayliklar yaratilgan. Xodimlarning sport bilan muntazam shugʻullanishlari uchun mini-futbol maydoni qurildi. 
 

Bularning hammasi xodimlarning siyosiy, maʼrifiy va jangovar tayyorgarligini kuchaytirishga, jinoyat va huquqbuzarlik sodir etilishining oldini olish, ularni tez fursatlarda fosh etishga xizmat qiladi.
 

Umuman, “Vobkent maxsus qurilish servis” masʼuliyati cheklangan jamiyati tomonidan amalga oshirilgan qurilish-taʼmirlash ishlariga 4 mlrd. soʻm mablagʻ sarflandi. 
 

Tadbirda loyihachi va muhandis-quruvchilarga minnatdorlik bildirildi va alohida ehtirom koʻrsatildi.

 

Ramziy lenta qirqilib, yigʻilganlar inshootda yaratilgan  shart-sharoitlar bilan yaqindan tanishdilar.