Kogon shahar 4-maktabda 840 o‘rinli zamonaviy ta’lim maskani barpo etilmoqda!
2026-08-12 15:55:00 / Yangiliklar
Kogonlik ota-onalar va o‘quvchilar uchun ajoyib yangilik!
Shahrimizning ko‘rkam maskanlaridan biri bo‘lgan 4-sonli umumiy o‘rta ta’lim maktabi tubdan yangilanib, o‘z bag‘rini yanada kengaytirmoqda.
Hukumatimizning 300-sonli qarori asosida ajratilgan 13,65 mlrd so‘mlik ulkan mablag‘ evaziga bu yerda haqiqiy bunyodkorlik ishlari ketmoqda.
Maktabning mavjud 540 o‘rinli binosi zamonaviy andozalar darajasida rekonstruksiya qilinayotgan bo‘lsa, uning yonida yana 300 o‘rinli yangi va shinam korpus qad rostlamoqda.
Demak, yangi o‘quv yilidan boshlab jami 840 nafar farzandlarimiz eng so‘nggi sharoitlarga ega bo‘lgan go‘zal maktabda tahsil oladilar!
Qurilish ishlarini tajribali pudratchi — "Kumush piramida" MChJ va uning rahbari Tagoyev Jo‘rabek boshliqlik mahoratli quruvchilar olib borishmoqda.
Nasib qilsa 20-avgust kuni ushbu muhtasham ziyo maskani quruvchilar tomonidan 4-maktab o‘quvchilariga foydalanishga topshiriladi.
Kogon shahar hokimligi matbuot xizmati