Kogon shahrida Koreyaning “KP Global” kompaniyasi va mahalliy hamkor ishtirokida tashkil etilgan “Master Innovation” qo‘shma korxonasi tomonidan beton uchun plastifikator ishlab chiqarishga ixtisoslashgan yangi loyiha amalga oshirilmoqda.
2026-02-05 11:55:00 / Yangiliklar
Loyihaga ko’ra, zamonaviy texnologiyalar asosida beton plastifikatorlari ishlab chiqarishni tashkil etish rejalashtirilgan. Ushbu mahsulotlar betonning mustahkamligi, texnologik xususiyatlari va ekspluatatsion sifatlarini yaxshilashda qo‘llaniladi. Ishlab chiqariladigan mahsulotlar uy-joy qurilishi, infratuzilma va sanoat obyektlarida foydalanishga mo‘ljallangan.
Korxona faoliyati mahalliy bozor ehtiyojlarini qondirish, import o‘rnini bosish, qurilish materiallari sohasida sanoat kooperatsiyasini rivojlantirish hamda kelgusida eksport hajmini kengaytirishga qaratilgan.
Yangi korxonaning ochilishi natijasida hududda yangi ish o‘rinlari yaratiladi, sanoat salohiyati oshadi hamda Buxoro viloyatining investitsiyaviy jozibadorligi yanada mustahkamlanadi.