Navoiy viloyati Karmana tumani hokimligi

Shu maqsadda Karmana tumani hokimi Shohruh Boltayevning “Sardoba” mahallasidagi ishsiz xotin-qizlar bilan 27-umumiy o‘rta ta’lim maktabida uchrashuvi tashkil etildi. Samimiy va ochiq muloqot ruhida o‘tgan uchrashuvda mahalladagi ayollarni ish bilan ta’minlash, ularning kasb-hunar egallashi hamda zamonaviy mehnat bozorida munosib o‘rin topishi masalalari muhokama qilindi.
 
Uchrashuv davomida “Yangi O‘zbekiston qiyofasida bunyod etilayotgan “Sardoba”da birorta fuqaro ishsiz bo‘lmasligi kerak” degan ezgu maqsad ilgari surildi. Bu g‘oya mahallada bandlikni ta’minlash borasidagi ishlarni yanada jadallashtirish, har bir ishsiz fuqaro uchun munosib mehnat imkoniyatini yaratish zarurligini anglatadi.
 
Ayniqsa, yangi tashkil etilayotgan “Sardoba tekstil” korxonasining ishga tushirilishi mahalladagi xotin-qizlar uchun yangi imkoniyatlar eshigini ochishi kutilmoqda. 80 ta yangi ish o‘rni yaratilishi rejalashtirilgan mazkur korxonaga mahalladagi ishsiz ayollar ishga taklif etildi.
 
Muloqot jarayonida ayollarga yangi ish o‘rinlarining imkoniyatlari, mehnat qilish uchun yaratiladigan sharoitlar va bandlikning oila farovonligidagi o‘rni haqida ma’lumot berildi. Eng muhimi, ushbu tashabbus mahalla xotin-qizlari tomonidan ko‘tarinki kayfiyatda, iliq munosabat bilan kutib olindi.
 
— “Sardoba”da har bir fuqaro o‘z mehnati bilan oilasi farovonligiga hissa qo‘shishi uchun imkoniyat yaratishimiz kerak. Ayniqsa, xotin-qizlarning bandligini ta’minlash — eng muhim vazifalarimizdan biri, — deya ta’kidlandi uchrashuvda.