O‘zbekiston Respublikasi qishloq xo‘jaligi vazirligi huzuridagi o‘simliklar karantini va himoyasi agentligi

Karantin agentligida “Jaholatga qarshi ma’rifat” mavzusida davra suhbati tashkil etildi

Bugungi kunda globallashuvning shiddatli tus olishi dunyo miqyosida g‘oyaviy-mafkuraviy tahdidlarning tobora avj olishiga  zamin yaratmoqda. Mana shunday bir sharoitda tinchlik, barqarorlikni saqlashda ma’naviyat va ma’rifatga e’tibor qaratish muhim ahamiyat kasb etadi.

Agentlik rahbariyati, markaziy apparatning boshqarma va bo‘lim boshliqlari hamda “ZOOM” platformasi orqali tizim tashkilotlari va hududiy boshqarmalarning rahbarlari va mas’ullari ishtirokida bo‘lib o‘tgan davra suhbatida Din ishlari bo‘yicha qo‘mita raisi maslahatchisi Ilhom Ma’rupov bugungi kunda globallashuvning shiddatli tus olishi dunyo miqyosida g‘oyaviy-mafkuraviy tahdidlarning tobora avj olishiga  zamin yaratayotganligini, ayni shu jarayonda Vatanni himoya etish, uni sevish va e’zozlash har bir insondan buyuk ma’naviy jasorat talab etishini ta’kidladi.

Davra suhbatida bugungi shiddatli globallashuv sharoitida islom dini qadriyatlari, uning tinchlikparvarlik mohiyati, yoshlarni diniy bag‘rikenglik va umuminsoniy qadriyatlarga hurmat ruhida tarbiyalash, ularda islom diniga yot radikal qarashlarga qarshi murosasizlik tuyg‘usini shakllantirish va bunda O‘zbekiston tajribasi, diniylik va dunyoviylik muvozanatini saqlash yo‘lidagi sa’y-harakatlari qatnashchilarga misollar orqali yetkazildi.

Ayni paytda O‘zbekistonning “Jaholatga qarshi – ma’rifat” shioriga muvofiq ravishda islom dinining tinchlikparvarlik, bag‘rikenglik va ma’rifatparvarlik g‘oyalarini tarqatishga, shu tariqa mamlakat, mintaqa va dunyo miqyosida radikalizm va ekstremizmga qarshi kurashni kuchaytirish, bu illatlarni tag-tomiri bilan yo‘q qilishga o‘z hissasini qo‘shishi ta’kidlab o‘tildi.

Qiziqarli va fikr-mulohazalarga boy ruhda o'tgan davra suhbati so'nggida xodimlar o‘zlarini qiziqtirgan savollarga javob oldilar.