Jondor tumani delegatsiyasi Xitoy tadbirkorlari bilan istiqbolli loyihalarni muhokama qildi
2026-05-13 23:05:00 / Yangiliklar
Buxoro viloyati Jondor tumani delegatsiyasi tomonidan bugun, 13-may kuni Xitoy Xalq Respublikasining Guychjou shahrida qurilish yo‘nalishidagi savdo-sanoat vakillari bilan uchrashuv o‘tkazildi. Uchrashuv davomida Jondor tumanining salohiyati va investitsion imkoniyatlari bo‘yicha taqdimot qilinib, batafsil ma’lumot berildi.
Tashrif davomida Guychjou shahrining yirik ko‘p qavatli turar joy binolarini qurish faoliyati bilan shug‘ullanuvchi “QIANNAN XUANXING INDUSTRIAL DEVELOPMENT” kompaniyasiga tashrif buyurilib, korxona faoliyati bilan yaqindan tanishildi. Kompaniya rahbariyati bilan olib borilgan muzokaralar davomida Jondor tumanida hamkorlikda loyihalarni amalga oshirish bo‘yicha dastlabki kelishuvlarga erishildi.
Shuningdek, Guychjou shahrida chorvachilik faoliyati bilan shug‘ullanuvchi “GUIZHOU YONGYING AGRICULTURAL TECHNOLOGY” kompaniyasiga tashrif buyurilib, korxonaning zamonaviy chorvachilik kompleksi faoliyati o‘rganildi.
Bundan tashqari, ko‘p qavatli turar joy binolari qurilishi bilan shug‘ullanuvchi “DASHENG LANDSCAPE MANSION” kompaniyasiga tashrif amalga oshirilib, kompaniya tomonidan barpo etilayotgan yangi turar joy loyihalari bilan tanishildi.
Tashrif doirasida QIANNAN CHJOI JIANGXI Savdo palatasi tadbirkorlari bilan ham davra suhbati tashkil etildi. Uchrashuv davomida Jondor tumanining iqtisodiy salohiyati va qulay investitsion imkoniyatlari yuzasidan taqdimot o‘tkazildi. Muzokaralar yakunida tomonlar o‘rtasida Jondor tumanida qo‘shma loyihalarni amalga oshirish bo‘yicha kelishuvlarga erishildi.