Samarqand viloyati Jomboy tumani hokimligi

Muzokaralar davomida umumiy qiymati 122 million AQSh dollariga teng investitsiya loyihalarini amalga oshirish masalalari muhokama qilindi. Xitoylik investorlar zamonaviy ishlab chiqarish texnologiyalarini joriy etish, korxonalar faoliyatini kengaytirish, yangi ish o‘rinlari yaratish hamda mahsulotlar eksporti hajmini oshirish bo‘yicha o‘z takliflarini bildirdi.

Uchrashuvda qishloq xo‘jaligi va oziq-ovqat sanoatini rivojlantirishga qaratilgan yana bir muhim yo‘nalish — akvakultura sohasidagi hamkorlik masalalari ham ko‘rib chiqildi. Xususan, marinka baliqlari va krevetka yetishtirish bo‘yicha umumiy qiymati 15 million dollarlik investitsiya loyihalari yuzasidan samarali muzokaralar olib borildi.

Ushbu loyihalar orqali hududga zamonaviy akvakultura texnologiyalari kirib keladi, oziq-ovqat xavfsizligini ta’minlash imkoniyatlari kengayadi hamda eksportbop mahsulotlar ishlab chiqarish hajmi sezilarli darajada ortadi. Bu esa yangi ish o‘rinlari yaratish bilan birga, mahalliy iqtisodiyotning barqaror rivojlanishiga ham xizmat qiladi.

Tomonlar o‘zaro manfaatli hamkorlikni yanada mustahkamlash, yangi investitsion loyihalarni qisqa muddatlarda amalga oshirish, ilg‘or texnologiyalarni joriy etish hamda uzoq muddatli sheriklik aloqalarini rivojlantirish bo‘yicha memorandum imzoladi.