Jizzaxda Salomatlik Bayrami: 5000 Qadam va Barkamollik Sari
2026-05-15 10:40:00 / Yangiliklar
15-may kuni “O‘rda” ekologik bog‘ida shahar tashkilotlari xodimlari, mahalla faollari hamda keng jamoatchilik vakillari ishtirokida navbatdagi “Sog‘liq uchun 5 ming qadam” marafoni tashkil etildi.
Mazkur tadbir aholining salomatligini mustahkamlash, jismoniy faollikni oshirish hamda sog‘lom turmush tarzini keng targ‘ib qilish maqsadida o‘tkazildi. Marafonda turli tashkilot va muassasalarda faoliyat yuritayotgan xodimlar, mahallalar vakillari hamda yoshlar faol qatnashib, piyoda yurish orqali sog‘lom hayot tamoyillarini qo‘llab-quvvatladilar.
Tadbir davomida ishtirokchilar bilan birgalikda ertalabki badantarbiya mashqlari, jismoniy faollikni oshiruvchi mashqlar hamda nafas olishni yaxshilashga qaratilgan shifo mashqlari bajarildi. Shuningdek, sog‘lom ovqatlanish, sport bilan muntazam shug‘ullanish va zararli odatlardan voz kechishning inson salomatligidagi ahamiyati haqida targ‘ibot-tushuntirish ishlari olib borildi.
Ayniqsa, oilaviy qadriyatlarni mustahkamlash, aholi salomatligini asrash hamda yoshlarni sportga keng jalb etishga qaratilgan bunday tadbirlar jamiyatda sog‘lom muhitni shakllantirishda muhim ahamiyat kasb etmoqda.
Axborot xizmati