“Askar ota-onalarini sharaflaymiz” — yuksak ehtirom ifodasi
2026-01-31 11:35:00 / Yangiliklar
Mazkur tadbirda Jizzax shahar hokimi Komil Xolmurodov, Iqtisodiy jinoyatlarga qarshi kurashish departamenti Jizzax viloyati boshqarmasi boshlig‘i Xurshid Mo‘minov, muddatli harbiy xizmatchilarning ota-onalari, chaqiruv yoshidagi o‘quvchi-yoshlar, mehnat faxriylari, hamda jamoat tashkilotlari va ularning hududiy bo‘limlari vakillari ishtirok etdi.
Tadbir davomida ota-onalar uchun maxsus tayyorlangan videoroliklar namoyish etildi. Unda muddatli harbiy xizmatchilarning milliy armiyamizdagi xizmat sharoitlari, yurtga bo‘lgan sadoqati, shuningdek, ota-onalariga yo‘llagan samimiy salom va minnatdorlik so‘zlari aks ettirildi.
Anjuman davomida so‘zga chiqqan shahar hokimi Komil Xolmurodov ota-onalarga murojaat qilib, ularning farzandlari bugungi kunda Vatan tinchligi va osoyishtaligini ta’minlash yo‘lida sidqidildan xizmat qilayotganini ta’kidladi. Shuningdek, shunday vatanparvar, fidoiy va sadoqatli farzandlarni voyaga yetkazgan ota-onalarga alohida minnatdorlik bildirildi.
Shu bilan birga, yoshlar o‘rtasida vatanparvarlik ruhini mustahkamlash, harbiy xizmatning sharafli va mas’uliyatli ekanini keng targ‘ib etish, chaqiruv yoshidagi yigitlarni ona Vatanga sadoqat ruhida tarbiyalash masalalari ham muhokama qilindi.