Madaniyat mahallasida uy-joy sharoitlarini yangilash bo‘yicha uchrashuv o‘tkazildi
2025-12-07 13:25:00 / Yangiliklar
Jizzax shahar Madaniyat mahallasida aholining turmush darajasini oshirish, zamonaviy va qulay yashash muhitini yaratish maqsadida amalga oshirilayotgan keng ko‘lamli bunyodkorlik ishlari doirasida muhim uchrashuv bo‘lib o‘tdi. Mazkur uchrashuv O‘zbekiston Respublikasi Prezidentining Renovatsiya dasturi ijrosini ta’minlash, shuningdek, foydalanish muddati o‘tib, ma'nan va jismonan eskirgan ikki qavatli uy-joylar o‘rnida yangi, mustahkam, zamonaviy ko‘p qavatli turar-joylar qurilishi bilan bog‘liq jarayonlarni mahalla aholisi bilan o‘zaro muhokama etishga bag‘ishlandi.
Uchrashuvda Jizzax shahar hokimi Komil Xolmurodov ishtirok etib, amalga oshirilayotgan bunyodkorlik ishlari, yashash sharoitlarini sifat jihatdan yaxshilashga qaratilgan loyihalar taqdimoti bilan tanishtirdi. Taqdimot davomida hokim yangi turar-joy majmualarining afzalliklari, qurilish sifati, xavfsizlik tizimi, ijtimoiy infratuzilma bilan uyg‘unligi va aholiga yaratiladigan qo‘shimcha qulayliklar haqida batafsil ma’lumot berdi.
Renovatsiya dasturi doirasidagi bu ishlar nafaqat mahallaning qiyofasini yangilash, balki aholining farovon turmushini ta’minlash, yoshlar va bolalar uchun xavfsiz, zamonaviy va qulay yashash maskani yaratishga xizmat qiladi.