O‘zbekiston Respublikasi Prezidentining 2025-yil 3-yanvardagi PQ–1-sonli qarori ijrosini ta’minlash yuzasidan olib borilgan targ‘ibot ishlari haqida
2025-04-10 17:25:00 / Yangiliklar
O‘zbekiston Respublikasi Prezidentining 2025-yil 3-yanvardagi PQ–1-sonli qarori ijrosini ta’minlash yuzasidan olib borilgan targ‘ibot ishlari haqida
O‘zbekiston Respublikasi Prezidentining 2025-yil 3-yanvardagi PQ–1-sonli “Hududlarni kompleks rivojlantirish, aholi turmush darajasini oshirish va mahallabay ishlash tizimini takomillashtirish chora-tadbirlari to‘g‘risida”gi qarori ijrosini ta’minlash maqsadida, Surxondaryo viloyatining Jarqo‘rg‘on tumanidagi Surxon sohili mahallasida keng ko‘lamli targ‘ibot-tashviqot ishlari olib borildi.
Tuman hokimi Elmurod Avazov boshchiligida o‘tkazilgan sayyor qabullar davomida mahalla aholisi bilan bevosita ochiq va samimiy muloqot o‘rnatildi. Qabulda ta’lim, sog‘liqni saqlash, ichimlik suvi ta’minoti, elektr energiyasi, yo‘l infratuzilmasi, bandlik, ijtimoiy himoya, tadbirkorlikni rivojlantirish kabi yo‘nalishlarda fuqarolar tomonidan ko‘tarilgan bir qator muhim masalalar ko‘rib chiqildi.
Sayyor qabul chog‘ida muammolarning aksariyatiga joyida yechim topildi. Qolgan murojaatlar bo‘yicha mutasaddi tashkilotlarga aniq topshiriqlar berilib, ijrosini nazoratga olish belgilandi. Shuningdek, fuqarolarga huquqiy maslahatlar, ijtimoiy dasturlar bo‘yicha amaliy ko‘mak, imtiyozli kreditlar va subsidiyalar to‘g‘risida batafsil ma’lumotlar berildi.
Tadbir doirasida mahalla faollari, xotin-qizlar, yoshlar yetakchilari hamda nuroniylar ishtirokida davra suhbatlari ham tashkil etilib, qarorning mazmun-mohiyati, uning aholi farovonligini oshirishdagi o‘rni va ahamiyati tushuntirildi. Ayni vaqtda, joylarda amalga oshirilayotgan islohotlarga nisbatan aholining ishonchi ortib borayotgani, ularning faolligi oshib, davlat va jamiyat hayotida yanada faol ishtirok etayotgani ta’kidlandi.
Mazkur targ‘ibot-tashviqot ishlari Prezident qarorining joylardagi ijrosini samarali tashkil etish, fuqarolarning ijtimoiy-iqtisodiy sharoitini yaxshilash hamda mahalla tizimi orqali tizimli va manzilli yondashuvni shakllantirish yo‘lida muhim qadam bo‘lib xizmat qilmoqda.