Surxondaryo viloyati Jarqo'rg'on tumani hokimligi

O‘zagroinspeksiyaning Jarqo’rg’on tuman bo‘limi tomonidan urug‘lik g‘alla maydonlarida nazorat ishlari olib borilmoqda

O‘zagroinspeksiyaning Jarqo’rg’on tuman bo‘limi tomonidan 2026-yil hosili uchun parvarish qilinayotgan urug‘lik g‘alla maydonlarida belgilangan tartib asosida nazorat va monitoring ishlari izchil amalga oshirilmoqda.

Mazkur tadbirlarning asosiy maqsadi — nav tozaligini saqlash, urug‘lik sifati ko‘rsatkichlarini ta’minlash hamda kelgusi ekin mavsumi uchun sifatli urug‘lik fondini shakllantirishdan iborat.

Bugungi kunda tumanda 2026-yil hosili uchun urug‘lik g‘alla yetishtirish huquqiga ega bo‘lgan 11 ta xo‘jalik faoliyat yuritmoqda. Ular tomonidan jami 468 gektar maydonda boshoqli don ekinlarining 1 ta navi bo‘yicha 1380.5 tonna sifatli, saralangan urug‘lik don yetishtirilishi rejalashtirilgan.

“Qishloq xo‘jaligi ekinlari urug‘liklarini yetishtirish huquqiga ega bo‘lish bo‘yicha tanlovlarni “E-urug‘” axborot tizimida tashkil etish va o‘tkazish tartibi to‘g‘risida”gi Nizomning 4-bobida elektron tanlov g‘olibining vazifalari va funksiyalari aniq belgilab berilgan.

Unga ko‘ra, quyidagilar urug‘lik ekinlarini yetishtirish huquqini qo‘lga kiritgan xo‘jaliklarning asosiy vazifalari hisoblanadi:

* Ko‘paytirilayotgan navning qimmatli xo‘jalik belgilari va texnologik xususiyatlarini saqlash;

* Yuqori sifatli, nav sofligiga ega bo‘lgan avlodli urug‘lar yetishtirish;

* Urug‘lik yetishtirish tartibi va qoidalariga qat’iy amal qilish;

* Nav originatori tomonidan ishlab chiqilgan ilmiy asoslangan tavsiyalar asosida agrotexnik tadbirlarni belgilangan muddat va me’yorlarda sifatli o‘tkazish;

* Urug‘lik maydonlarini begona navlar va o‘simliklardan tozalash;

* Kasallik keltirib chiqaruvchi begona ekinlarni urug‘lik maydonlar atrofiga ekmaslik hamda boshqa navlar bilan chatishishga yo‘l qo‘ymaslik.

Shuningdek, mazkur Nizom talablari yoki agrotexnika qoidalari muntazam ravishda buzilgan taqdirda, urug‘lik yetishtirilayotgan maydonlar tuman aprobatsiya komissiyasi tomonidan yaroqsiz deb topilishi hamda xo‘jalik urug‘lik yetishtirish huquqidan mahrum etilishi belgilangan.

Xulosa o‘rnida aytish mumkinki, tumanda urug‘lik g‘alla maydonlarida olib borilayotgan nazorat va amaliy yordam ishlari fermer xo‘jaliklarining yuqori hosildorlikka erishishi, sifatli urug‘lik zaxiralarini yaratish hamda qishloq xo‘jaligi ekinlari hosildorligini barqaror oshirishga xizmat qiladi.

Sifatli urug‘ — barqaror hosil kafolatidir. Bu haqiqatni har bir fermer xo‘jaligi rahbari chuqur anglab yetishi lozim.

“O‘zagroinspeksiya”ning Jarqo’rg’on tuman bo‘limi