Surxondaryo viloyati Jarqo'rg'on tumani hokimligi

Sud nazoratining kuchaytirilishi – korrupsiyaga qarshi kurashning samarali vositasi

Korrupsiyaga qarshi kurashishda sud nazoratining o‘rni beqiyosdir. Sud nazorati bu faqat protsessual jarayonlarni ko‘rib chiqish emas, balki inson huquq va erkinliklarini ta’minlash, tergov organlari faoliyatining qonuniyligini tekshirish, asossiz qarorlarning oldini olish orqali adolatni qaror toptirish demakdir.

So‘nggi yillarda tergov sudyalari faoliyatining takomillashtirilgani, ularning vakolatlari aniq belgilab berilgani, har bir protsessual majburlov chorasini qo‘llashda sudning roziligi talab etilishi korrupsiyaviy holatlarning oldini olishga xizmat qilmoqda. Qamoqqa olish, uy qamog‘i, tintuv o‘tkazish, telefon so‘zlashuvlarini eshitish kabi protsessual harakatlarga faqat sud sanksiyasi bilan ruxsat berilishi qonun ustuvorligini ta’minlashning muhim kafolatidir.

Sud majlislarida taraflarning tengligi, tortishuv tamoyilining to‘liq ta’minlanishi, advokatlarning faol ishtiroki uchun yaratilgan shart-sharoitlar odil sudlovning muhim mezonlaridan biridir. Bu esa fuqarolarning sud hokimiyatiga bo‘lgan ishonchini yanada mustahkamlamoqda.

Shu bilan birga, sud qarorlarining ochiq e’lon qilinishi, sud majlislarining shaffof tarzda o‘tkazilishi jamoatchilik nazoratini kuchaytirib, korrupsiyaga qarshi kurashishda muhim omil bo‘lib xizmat qilmoqda.

Korrupsiyaning oldini olishda faqat jazolash choralarini qo‘llash yetarli emas. Eng asosiysi – uning kelib chiqishiga sabab bo‘layotgan omillarni aniqlash va bartaraf etishdir. Bu borada sudlar tomonidan chiqarilayotgan xususiy ajrimlar muhim ahamiyat kasb etadi.

Jinoyat ishlari bo‘yicha Jarqo‘rg‘on tuman sudi tergov sudyasi B.Choʻliyev