Surxondaryo viloyati Jarqo'rg'on tumani hokimligi

Sud devonxonasida korrupsiyaga qarshi kurash — shaffoflik va xizmat intizomi mezoni

Korrupsiyaga qarshi kurash sud tizimining faqat sudyalar faoliyati bilan cheklanib qolmaydi, balki sud devonxonasi va barcha yordamchi bo‘g‘inlarning halolligi va mas’uliyatiga ham bevosita bog‘liqdir. Sud devonxonasi sud faoliyatining tashkiliy va hujjat aylanishi bilan bog‘liq asosiy bo‘g‘ini bo‘lib, aynan ushbu yo‘nalishda shaffoflik va intizom ta’minlanmasa, korrupsion holatlar yuzaga kelishi xavfi ortadi. Shu bois devonxona xodimlari korrupsiyaga qarshi kurashda alohida mas’uliyatni his etishi lozim.

Sud hujjatlarining qabul qilinishi, ro‘yxatga olinishi, ishlarning o‘z vaqtida va belgilangan tartibda sudyalarga taqsimlanishi devonxona faoliyatining muhim jihatlaridan hisoblanadi. Ushbu jarayonlarda har qanday sun’iy to‘siq, kechiktirish yoki manfaatdorlik holati korrupsiyaga zamin yaratishi mumkin. Shuning uchun ham devonxonada ish yuritish jarayonlari qat’iy reglament asosida, raqamli texnologiyalar yordamida amalga oshirilmoqda. Elektron hujjat aylanishi tizimi inson omilini kamaytirib, shaffoflikni ta’minlashga xizmat qilmoqda.

 Jinoyat ishlari bo‘yicha Jarqo‘rg‘on tumani sudi devonxonasida korrupsiyaga qarshi ichki nazorat mexanizmlari yo‘lga qo‘yilgan bo‘lib, har bir xodimning xizmat vazifalari aniq belgilangan. Xodimlar o‘rtasida xizmat etikasi qoidalariga rioya etish, manfaatlar to‘qnashuviga yo‘l qo‘ymaslik, fuqarolar bilan muloqotda xushmuomalalik va qonuniylikka amal qilish bo‘yicha muntazam tushuntirish ishlari olib borilmoqda. Devonxona xodimi uchun eng muhim talab — bu halollik va mas’uliyatdir.

Fuqarolar bilan ishlash jarayonida ochiqlik va xolislikni ta’minlash korrupsiyaga qarshi kurashning muhim omilidir. Har bir murojaat qonun doirasida ko‘rib chiqilishi, hech bir fuqaro e’tibordan chetda qolmasligi lozim. Agar fuqarolar sud devonxonasi faoliyatida adolat va shaffoflikni ko‘rsa, ularning sud tizimiga bo‘lgan ishonchi yanada mustahkamlanadi.

Korrupsiyaga qarshi kurashda jamoaviy mas’uliyat ham muhim ahamiyatga ega. Har bir xodim o‘z hamkasbining noqonuniy xatti-harakatlariga befarq bo‘lmasligi, bunday holatlarga nisbatan murosasiz munosabatda bo‘lishi zarur. Chunki bitta xodimning xatosi butun tizim nufuziga putur yetkazishi mumkin.

Xulosa o‘rnida aytish joizki, sud devonxonasida korrupsiyaga qarshi kurash — bu kundalik mehnat, intizom va halollik talabidir. Har bir hujjat, har bir murojaat va har bir xizmat jarayoni qonuniylik asosida amalga oshirilsa, sud tizimi yanada ochiq, ishonchli va adolatli bo‘ladi. Bu esa jamiyatda qonun ustuvorligini mustahkamlashga xizmat qiladi.

Jinoyat ishlari bo‘yicha Jarqo‘rg‘on tumani sudi devonxona mudiri A. Davronov