Surxondaryo viloyati Jarqo'rg'on tumani hokimligi

Jarqo‘rg‘on tuman IIB boshlig‘i podpolkovnik Qo‘ngratov Mirzohid Sharapullaevichning huquqbuzarliklarning barvaqt profilaktikasi va jinoyatchilikning oldini olish bo‘yicha tumanimiz aholisiga yo‘llagan

MUROJAATI

Assalomu alaykum,

Hurmatli tumanimiz aholisi

Muhtaram Prezidentimizning ta’biri bilan aytganda – Mahalla – tinchlik va osoyishtalik poydevori, ahillik va hamjihatlik, ma’rifat va tarbiya qo‘rg‘onidir.

Bu esa aholini har qanday tahdidlardan kafolatli himoya qilish hamda aholi orasida ijtimoiy-ma’naviy muhitni sog‘lomlashtirishga qaratilgan ijtimoiy-profilaktik tadbirlarga barchamiz birdek mas’ulligimizni belgilab berdi.

Jumladan, “Obod va xavfsiz mahalla” tamoyili asosida hududiy profilaktika inspektorlari tomonidan alohida e’tibor qaratishimiz lozim bo‘lgan yohud huquqbuzarlikdan jabrlanish ehtimoli yuqori bo‘lgan shaxslarga berilgan xulosalarga asosan muammolar o‘z vaqtida bartaraf etilmoqda.

O‘zbekiston Respublikasi Prezidentining 03.11.2025 yildagi “Aholi alomatligi va millat genofondini giyohvandlik va narkojinoyatlardan samarali himoya qilish bo‘yicha kompleks chora-tadbirlar to‘g‘risida”gi 207-sonli Farmoni, Ichki ishlar vazirining 2025 yil 17-noyabr kunidagi 428-sonli farmoyishi hamda Viloyat IIB boshlig‘inig 2025 yil 19-noyabr kunidagi 123-sonli farmoyishi ijrosini yuzasidan tumanimiz hududida jamoat tartibini saqlash, fuqarolar xavfsizligini ta’minlash, huquqbuzarliklar hamda jinoyatchilikning oldini olish bo‘yicha ishlarni samarali tashkil etish maqsadida 2025-yil 20-noyabrdan 20-dekabrga qadar tuman miqyosida “Xavfsiz va sog’lom yurt” keng qamrovli profilaktik tadbirlar o‘tkazib borilmoqda.

Mahallalarni jinoyatdan holi hududga aylantirish va jinoyatchilikni “mahallabay” jilovlash asosida olib borilgan kompleks profilaktik chora-tadbirlar natijasida tumanimizdagi 66 ta mahallalarning 48 tasida ya’ni 72 foizidan ko‘prog‘ida birorta ham jinoyat sodir etilmadi.

Sodir etilgan 241 ta jinoyatlardan 1 tasi fosh etilmagan bo‘lib, jinoyatlar fosh etilishi 98,5 foizni tashkil qiladi;

Ayniqsa, oldi olinishi lozim bo‘lgan jinoyat turlaridan –qastdan badanga og‘ir shikast yetkazish, qastdan badanga o‘rtacha shikast yetkazish, qastdan badanga yengil shikast yetkazish jinoyatlari kamayishga erishildi.

Nomusga tegish, talonchilik, tovlamachilik, transport vositasini olib qochish va mulkni qastdan nobud qilish jinoyatlari sodir etilmadi.

O‘tgan davr mobaynida, amalga oshirilgan tezkor-qidiruv tadbirlar natijasida:

– 32 nafar qidiruvdagi shaxslar ushlanib, jazo muqarrarligi ta’minlandi;

– qanchadan-qancha odamlarning hayotiga zomin bo‘layotgan 20 ta holatda giyohvandlik moddasining noqonuniy muomalasiga chek qo‘yildi va tegishli tartibda hujjatlashtirildi.

– jamoat joylarida bemaqsad yurgan shaxslardan 263 ta sovuq qurollar olindi;

– o‘tkazilgan tekshiruvlar natijasida fuqarolardan 11 ta o‘q-otar va pnevmatik qurollar olib qo‘yildi.

Bundan tashqari, turli mudhish jinoyatlarga sabab bo‘lishi mumkin bo‘lgan huquqbuzarliklarni sodir etganligi uchun13.257 ta shaxslar ma’muriy javobgarlikka tortildi.

– 54 nafar spirtli ichimlikka ruju qo‘ygan, 2 nafar giyohvand va  6 nafar ruhiy kasallar davolanish muassasalariga joylashtirildi;

– qarovsiz qolgan 54 nafar bolalar voyaga yetmaganlarga ijtimoiy-huquqiy yordam ko‘rsatish markaziga joylashtirildi.

Belgilagan tizim asosida ishlashga o‘tganimiz natijasida, har uchinchi jinoyat xodimlarning tashabbusi bilan aniqlandi.

Lekin, bu bilan ortiqcha xotirjamlikka berilmasdan, har birimizdan doimo ogoh va sergak bo‘lishni, vaziyatni to‘g‘ri baholashni, har qanday holatda ham bee’tibor bo‘lmasdan xizmat olib borishni talab etadi.

Shu o‘rinda, fuqarolarimizdan doimo hushyor bo‘lishlarini, xonadon, uy hayvonlari va boshqa ko‘rinishdagi mol-mulklari qarovsiz va ochiq qoldirmasliklarini, har qanday shubhali shaxslar nayranglariga uchmaslikni va albatta shaxsiy xavfsizligiga e’tiborli bo‘lishlarini so‘rab qolardim.

Har birimiz, Tinchlik – bebaho ne’matligini his etib, vatanimiz mustaqilligi va xalqimiz tinchligini ko‘z qorachig‘idek saqlashimiz lozim.

Qonunlarga qat’iy rioya etish, o‘zgalar huquqi, sha’ni va qadr-qimmatini, mol-mulki daxlsizligini hurmat qilish ham qonuniy, ham insoniy burchimiz ekanini doimo yodda tutishimiz zarur bo‘ladi.

E’tiboringiz uchun rahmat.