Surxondaryo viloyati Jarqo'rg'on tumani hokimligi

Surxondaryo viloyati Jarqo‘rg‘on tumani prokurori

To‘raqulov Komil Xo‘janazarovichning

tuman aholisiga

M U R O J A A T I

Assalomu alaykum, hurmatli Jarqo‘rg‘on tumani fuqarolari !

So‘nggi yillarda mamlakatimizda Hurmatli Yurtboshimiz boshchiligida aholi, ayniqsa yoshlar va xotin-qizlarning bandligini taʼminlash, tadbirkorlikni rivojlantirish, orzu - intilishlarini to‘liq ro‘yobga chiqarish, bir so‘z bilan aytganda, ularni har tomonlama qo‘llab-quvvatlash borasida keng ko‘lamli islohotlar olib borilmoqda.

Ushbu islohotlar natijasida yaratilgan imkoniyatlardan to‘g‘ri foydalanib, ilm - fan va sportda yuksak natijalarga erishayotgan

hamda nafaqat yurtimiz balki, butun dunyoga mashhur qilayotgan boshqalarga o‘rnak bo‘la oladigan maktab o‘quvchilari va yoshlarimiz borligi quvonarli, albatta.

Hozirgi kunda Internet global tarmog‘idan butun dunyoda, shu jumladan, vohamizning barcha hududlarida, xususan, tumanimizda ham keng foydalanilmoqda. Bu fuqarolarga qulayliklar yaratmoqda.

Misol uchun, davlat xizmatlaridan onlayn foydalanish, banklardan onlayn kredit olish, tovarlarni xarid qilish, tezkor yetkazib berish

kabi ko‘plab sohalarda imkoniyatlar yaratilishiga hamda ularning vaqtini tejashga olib kelmoqda.

Biroq, Internet tarmog‘idan noto‘g‘ri foydalanish natijasida fuqarolar, ayniqsa, yoshlarning ko‘p vaqti foydasiz va keraksiz kontentlarni ko‘rish uchun sarflanmoqda, hattoki, buning taʼsirida turli xil og‘ir jinoyatlar sodir etishlari va jinoyatlardan jabrlanishiga sabab bo‘lmoqda.

Oqibatda, ayrim shaxslar jamiyatda yurish - turish qoidalarini buzish, oson yo‘l bilan boylik orttirish, fuqarolarni aldab, ishonchiga kirish va boshqa noqonuniy yo‘llar orqali milliy qadriyatlarimizga putur yetkazayotgani juda ham achinarli.

Bu kabi salbiy holatlar kelib chiqmasligi uchun avvalo “mahalla yettiligi”, bundan tashqari, barcha idora va tashkilotlar hamda xalqimiz bilan birgalikda avvalo, mahallalarda xavfsiz muhitni yaratish hamda jinoyatchilik profilaktikasi, ayniqsa, “ijtimoiy profilaktika” tadbirlariga alohida eʼtibor qaratilmoqda.

Olib borilgan profilaktik choralar natijasida mahallalarda oldini olish mumkin bo‘lgan jinoyatlar salmog‘i kamayishiga erishildi.

Biroq, yaratilgan keng imkoniyatlarga qaramasdan, tumanimizda voyaga yetmaganlar, yoshlar, ayollar va ishsizlar tomonidan jinoyatlar sodir etilmoqda.

Muhtaram Prezidentimiz jismonan sog‘lom, ruhan va aqlan rivojlangan, mustaqil fikrlaydigan, Vatanga sodiq, qatʼiy nuqtai nazarga ega yoshlarni tarbiyalash, demokratik islohotlarni chuqurlashtirish va fuqarolik jamiyatini rivojlantirish jarayonida ularning ijtimoiy faolligini oshirishni ustuvor vazifa etib belgilab berganlar.

Islohotlar natijasida yaratilgan shart - sharoitlardan juda ko‘plab yoshlar unumli foydalanib, avvalo o‘z oilasi va yurtimiz rivojiga o‘zining beqiyos hissasini qo‘shmoqda.

Xalqimiz azal - azaldan xotin - qizlarimizga hurmat ko‘rsatib keladi, bu davlat siyosatida ham o‘z aksini topib, oilalardagi muhitni yaxshilash, ayniqsa, ayollar muammolarini o‘rganib, hal etish mexanizmi yaratilgan.

Hurmatli  tumanimiz aholisi !

Shu sababli, xalqimiz bilan birga berilgan imkoniyatlardan to‘liq foydalanish, aholini har tomonlama qo‘llab - quvvatlash, jinoyatchilik profilaktikasini kuchaytirish orqali yanada ijobiy natijalarga erishishimiz zarur.

Xabaringiz bor, huquqni muhofaza qiluvchi idoralar va “mahalla yettiligi” aʼzolari masʼul idoralar hamda keng jamoatchilik bilan hamkorlikda jinoyat va huquqbuzarliklarning oldini olish, tumanda kriminogen vaziyat barqarorligini taʼminlash bo‘yicha kuchaytirilgan ish tartibi joriy etilgan.

Bu esa jinoyatchilik profilaktikasi, ayniqsa har bir jinoyat uchun jazo muqarrarligini taʼminlash hamda jinoyat sodir etgan shaxslarni qisqa vaqtda aniqlashga salmoqli hissa qo‘shmoqda.

Shu maqsadda bundan keyin ham :

- jinoyat va huquqbuzarlik sodir etishga moyil bo‘lgan shaxslar toifasi bilan manzilli “ijtimoiy profilaktika” tadbirlar kuchaytiriladi;

- sodir etilgan jinoyatlar har kuni tezkor tahlil qilib boriladi;

- kunlik so‘rov va nazorat tizimi izchillik bilan davom ettiriladi.

Aziz Jarqo‘rg‘on  tumani aholisi !

Jinoyatchilikning oldini olish va huquqbuzarliklar profilaktikasi samaradorligini oshirishda “mahalla yettiligi” aʼzolari, oqsoqollar, otinoyilar taʼlim - tarbiyaga masʼullar, umuman har bir fuqaroning amaliy yordami hamda hamkorligi muhim ahamiyatga ega.

Shu sababli, tumanimizdagi barcha mahallalarni jinoyatdan holi, tinch va xavfsiz hududga aylantirishga har birimiz o‘z hissamizni qo‘shib, birgalikda harakat qilsak, ko‘zlangan maqsadga albatta erishamiz.

Kelingizlar, barchamiz shu yo‘lda muhtaram Prezidentimizga

yelkadosh bo‘lib, qonun ustuvor, adolat hukmron bo‘lgan jamiyatni birgalikda barpo etaylik!