O‘zbekiston Respublikasi Iqtisodiyot va moliya vazirligi

Ushbu loyiha Shveytsariya Taraqqiyot va Hamkorlik Agentligi (SDC) tomonidan moliyalashtirilmoqda. Yig‘ilishda O‘zbekistonda raqamli iqtisodiyotni rivojlantirish loyihasini 2023-yil va 2024-yilning birinchi yarmida amalga oshirish bo‘yicha oraliq natijalar ko‘rib chiqildi.

Yig‘ilishda O‘zbekiston Raqamli texnologiyalar vazirligi, BMT Taraqqiyot Dasturi, Shveysariya Taraqqiyot va Hamkorlik Agentligi (SDC) va boshqa loyiha hamkorlaridan iborat asosiy manfaatdor tomonlar ishtirok etdi.

Tadbir davomida loyihaning 2023-yildagi asosiy natijalari taqdim etildi:

·       13 ta hududdan 304 nafar yosh xotin-qiz biznes-jarayonlarni raqamlashtirish bo‘yicha o‘qitildi, bu esa o‘z tadbirkorlik tashabbuslarini yanada samarali boshqarish imkonini berdi;

·       160 nafar yosh startapi, jumladan, 35 nafar xotin-qiz biznes ta’limi va rivojlanishi sohasida qo‘llab-quvvatlandi va bu ularning bozordagi mavqeini mustahkamlashga xizmat qildi;

·       8 ta hududda 24 ta xususiy o‘quv markazlarida biznes jarayonlarini avtomatlashtirish bo‘yicha raqamli yechimlar joriy etildi va bu ularning samaradorligini sezilarli darajada oshirdi;

·       853 nafar qishloq yoshlari o‘z raqamli ko‘nikmalarini oshirdi, bu esa ularning ish bilan ta’minlanish imkoniyatlari va iqtisodiy faolligini yuksaltiradi.

Bundan tashqari, loyiha doirasida startaplar uchun biznes-inkubatsiya va akseleratsiya dasturlarini ishga tushirish va yuritish bo‘yicha 3 ta metodik qo‘llanma ishlab chiqildi hamda venchur moliyalashtirish va startap ekotizimini rivojlantirish masalalari bo‘yicha davlat-xususiy muloqotining 4 ta sessiyasi tashkil etildi.

Loyiha shuningdek, O‘zbekistonda iqlim loyihalari va tadbirlarini moliyalashtirish mexanizmini operatsionlashtirish bo‘yicha tahliliy hisobot ishlab chiqishga ko‘maklashdi va venchur moliyalashtirish bo‘yicha 10 ta video dars tayyorlandi.

Loyiha qulay raqamli muhitni yaratish va O‘zbekistonda yoshlar tadbirkorligini rivojlantirish uchun institutsional imkoniyatlarni mustahkamlash bo‘yicha faol ish olib bormoqda, bu esa mamlakat iqtisodiyotining umumiy raqamli transformatsiyasiga hissa qo‘shmoqda.

Bundan tashqari, ishtirokchilar 2024-yilning qolgan qismi uchun quyidagi rejalarni ko‘rib chiqib, muhokama qildi:

·       yoshlar tomonidan boshqariladigan biznes uchun raqamli salohiyatni oshirish bo'yicha treninglarni ishlab chiqish va o'tkazish;

·       yosh xotin-qizlar uchun moslashtirilgan raqamli amaliyot dasturini ishlab chiqish va amalga oshirish;

·       startaplar uchun tadbirlar (Startup Weekend Central Asia, PizzaPitch XL Women, Pizza Pitch XL va boshqalar) tashkil etilishini qo‘llab-quvvatlash;

·       milliy ma'lumotlar strategiyasini ishlab chiqish va sun’iy intellekt strategiyalari bo‘yicha tavsiyalarni taqdim etish;

·       aholining raqamli savodxonlik darajasini o‘lchash uchun “Raqamli fuqaro” platformasini ishlab chiqish;

·       Oliy taʼlim, fan va innovatsiyalar vazirligi bilan hamkorlikda Oʻzbekistonning tanlangan oliy taʼlim muassasalarida akseleratsiya dasturlarini institutsionallashtirish;

·       Davlat xususiy muloqot (PPD) platformasini tashkil etish uchun vositalar va qoidalar to‘plamini ishlab chiqish va davlat va xususiy manfaatdor tomonlar ishtirokida PPD namunaviy sessiyasini o‘tkazish;

·       xususiy ekotizim ishtirokchilari bilan birgalikda mahalliy xususiy investorlar klubini yaratishga ko‘maklashish;

·       Koreya taraqqiyot instituti bilan birgalikda O‘zbekistonning moliyaviy xizmatlar bo‘yicha Tartibga solish qumdoniga oid Pilot dasturini amalga oshirishda Iqtisodiyot va moliya vazirligiga ko‘maklashishni davom ettirish.

Kengash erishilgan natijalardan mamnunligini bildirdi va O‘zbekistonning raqamli transformatsiyasi maqsadlarini qo‘llab-quvvatlashga sodiqligini tasdiqladi. Kelgusi davrda loyiha ushbu tashabbuslarni kengaytirishga qaratiladi.

Loyiha Kengashi yil oxirida yana yig‘ilib, yil davomida erishilgan yutuqlarni ko‘rib chiqadi va loyihaning keyingi bosqichi uchun rejani belgilaydi.

Iqtisodiyot va moliya vazirligi

Axborot xizmati