Hududlarda. “Yashil” maqomini yoʻqotmaydi
2025-03-02 07:55:00 / Yangiliklar
Paxtakor tumani IIB JXX HPB profilaktika inspektori, katta leytenant Toʻlqin Omonqulov ayolning ikki ogʻiz soʻzidan masala mohiyatini tushundi. Bundan ikki hafta ilgari bezorilik qilgani uchun B.D. javobgarlikka tortilgandi. Erkak maʼmuriy qamoq jazosini oʻtab, uyiga qaytgach, uning ustidan shikoyat yozgan qoʻshnisidan qasd olishga chogʻlangan koʻrinadi.
Qoʻshnilar janjallashayotgan manzilga yetib borgan profilaktika inspektori kelishmovchilikka barham berish choralarini koʻra boshladi. Ammo spirtli ichimlik taʼsirida boʻlgan B.D. qonun himoyachisining talablariga boʻysunmadi. Shu bois katta leytenant uning qoʻllariga kishan taqib, avtouloviga chiqardi. Voqea sud tomonidan bezoriga 7 sutkalik maʼmuriy qamoq jazosi tayinlanishi bilan yakun topdi.
Ora-sira shunga oʻxshash huquqbuzarliklar sodir etilishini aytmasa, «Dilorom» mahallasi tinch joy. Jumladan, mahalla oʻtgan yili «yashil» maqomini yoʻqotmadi, joriy yilda ham hududda jinoyat sodir etilmagan. Tabiiyki, mazkur natija mahalla yettiligi, xususan, katta leytenant Toʻlqin Omonqulovning saʼy-harakatlari samarasidir.
Chunonchi, u jinoyatlar sodir etilishining oldini olish maqsadida maʼmuriy nazorat ostidagi 3 nafar, jazoni ochiqda oʻtayotgan 5 nafar, ichki ishlar organlarida hisobda turadigan 20 nafar, muqaddam sudlangan 46 nafar shaxs bilan doimiy ravishda profilaktik tadbirlarni amalga oshiradi. Ayni maqsadda joriy yilning oʻtgan davrida 32 ta maʼmuriy bayonnoma rasmiylashtirdi, ichkilikka ruju qoʻygan 2 kishining 6 oy muddatga majburiy davolanishga yotqizilishini taʼminladi.
Qolaversa, oʻtgan yili mahalla yettiligi 173 kishini ishga joylashtirdi, 7 nafar yoshga 30 yil muddatga 1 gektardan yer ajratildi. 15 nafar ayol subsidiya asosida tikuv mashinasi bilan taʼminlandi. Bu yil mazkur yoʻnalishdagi ishlarni yanada kuchaytirish rejalashtirilgan. Qolaversa, mahalla faollari hamda ilgʻor yoshlardan tuzilgan 2 ta guruh profilaktika inspektoriga tungi xizmatni bajarishida koʻmak berayotir.
Aytgancha, fevral oyida koʻchalarning kirish va chiqish joylariga 12 ta zamonaviy kuzatuv kamerasi oʻrnatilib, bunday qurilmalar soni 25 taga yetkazildi. Shuningdek, 31 ta yoritkich oʻrnatildi. Xullas, «Dilorom» mahallasida jinoyatchilikni jilovlamoq uchun hamma imkoniyatlar ishga solinayotir.
Alijon ABDUSATTOROV, oʻz muxbirimiz.
Jizzax viloyati.