O‘zbеkiston Rеspublikаsi Ichki ishlаr vаzirligi

Prezidentimizning «2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha choratadbirlar toʻgʻrisida»gi qarori mahalla tizimidagi islohotlarni yangi bosqichga olib chiqadigan muhim hujjat boʻldi, deyish mumkin.

Qarorda Jamoat xavfsizligi universiteti tomonidan yanvar fevral oylarida «qizil» toifadagi, mart aprel oylarida «sariq» toifadagi mahallalarda ilmiy yondashuvlar asosida oʻrganish ishlarini olib borish koʻzda tutilgan boʻlib, hozirda bu jarayon qizgʻin davom etmoqda. Chunonchi, Fargʻona viloyatida ikki hududga boʻlingan holda ilmiy yondashuvlar asosida oʻrganish va monitoring ishlari olib borilyapti. Ishchi guruh aʼzolari Bagʻdod tumanidagi «Doʻrmoncha» va «Oʻzbekiston» mahallalariga tashrifi davomida mahalla yettiligi, sektor rahbari va profilaktika inspektori bilan suhbatlashdi. Shuningdek, oʻtgan yilgi jinoyatchilik ahvoli bilan tanishilib, kelgusida jinoyatchilikka barham berish boʻyicha tavsiyalar berishdi.

Oʻrganishlar davomida Oʻzbekiston tumanidagi «Bogʻi Eram» va «Beruniy» mahallalarida oʻtgan yilda jinoyat va huquqbuzarliklar salmogʻi oshib ketgani maʼlum boʻldi. Ushbu mahallalardagi vaziyat chuqur tahlil qilinib, ularning oldini olish borasida alohida yoʻl xaritasi tuzildi.

Ishchi guruh faoliyati Qoʻqon shahridagi «Rayhon» va «Nurafshon» mahallalarida davom etdi. Masalan, «Rayhon» mahallasida jinoyatchilik salmogʻi sezilarli kamaygan boʻlsa, «Nurafshon» mahallasida aksincha, oʻtgan yili 23 ta jinoyat qayd etilgan. Shu bois ana shu mahallaga koʻproq eʼtibor qaratilib, jinoyatlarning sabab va omillari oʻrganib chiqildi. Shunga koʻra, eʼtibor qaratish zarur boʻlgan manzillar, oilalar belgilab olindi.

Soʻx tumanidagi «Qalʼa» mahalla fuqarolar yigʻinida 2021 nafar aholi istiqomat qiladi. 2024-yili profilaktika inspektori hamda mahalla faollari tomonidan alohida toifadagi shaxslar roʻyxati shakllantirilib, manzilli ishlar olib borildi. Raqamlashtirishga eʼtibor qaratilib, mahallaning asosiy joylariga kuzatuv kameralari oʻrnatildi. Oʻrganishlar jarayonida ishchi guruh aʼzolari ana shu jihatlarga eʼtibor qaratib, oʻz tavsiyalarini berdilar. Xuddi shunday, chegara hududida joylashgan «Hushyor» mahallasida ham oʻrganish ishlari olib borilib, yettilik aʼzolariga uslubiy koʻmak koʻrsatildi.

Fargʻona shahridagi «Navroʻz» va «Mashʼal» mahallalari aholisi va tadbirkorlari bilan «Obod va xavfsiz mahalla» tamoyili asosida suhbatlar olib borildi. Tadbir davomida aholiga qoʻriqlash xizmatidan foydalanishning afzalliklari, tezkor harakatlanuvchi guruh xodimlarining imkoniyatlari, qoʻriqlash-signalizatsiya vositalarining ishlash usullari malakali mutaxassislar tomonidan tushuntirildi.

Ishchi guruh oʻrganishlari Dangʻara tumanidagi «Pishqoʻrgʻon» va «Shodlik», Buvayda tumanidagi «Yashnarobod» va «Buvayda», shuningdek, Uchkoʻprik tumanidagi «Tojik» mahallalarida olib borildi.

Oʻrganishlar jarayonida ishchi guruh tuman va mahallalarda mutasaddi rahbarlar bilan yuzma-yuz muloqot qilib, raqamlashtirishga alohida eʼtibor qaratish, kriminogen vaziyat ogʻir hududlarga koʻproq videokuzatuv kameralarini oʻrnatish, koʻp qavatli va yakka tartibdagi xonadonlar, savdo-maishiy xizmat koʻrsatish obyektlarini domofonlar bilan jihozlash, «Namunali xavfsiz koʻcha»lar tashkil qilish boʻyicha zarur tavsiyalar berishdi.

Abduvosit Sidiqov, oʻz muxbirimiz. “Postda”
Fargʻona viloyati