Ayollarimizning jamiyatimizda tutgan oʻrni, yurtimiz ravnaqiga qoʻshayotgan hissasi beqiyosdir. Qaysi jabhani olib qaramang, barchasida ayolning qoʻli, mehnati va tafakkurining guvohi boʻlamiz. Ichki ishlar organlarida ham mana shunday oʻz kasbiga fidoyi, vazifalarini sidqidildan bajarib, zaminimiz tinchligi va barqarorligiga oʻz ulushlarini qoʻshib kelayotgan ayollarimiz koʻpchilikni tashkil etadi. Ularning yurtimiz tinchlik-osoyishtaligini taʼminlash yoʻlida olib borayotgan xizmatlari eʼtirofga sazovor. Ishonib topshirilgan vazifalari qatorida oilani ham tebratib, mahalla koʻyda obroʻ-eʼtibor qozonish bilan birga oʻz dunyoqarashi, bilim va malakalarini oshirib borishga fursat topayotgani, boz ustiga oʻz iqtidorlari va imkoniyatlarini ham namoyish etayotgani quvonarli.

Yurtboshimiz tomonidan ayol-qizlarimizga koʻrsatilayotgan eʼtibor, jamiyatda, oilada oʻz oʻrnini topishi, barkamollikka erishishi borasida qabul qilinayotgan huquqiy hujjatlar, yaratilayotgan shart-sharoitlarni-ku son-sanogʻi yoʻq hisob. Bu borada Ichki ishlar vazirligi tomonidan ham xodima ayol-qizlarning kasbiy bilim va malakalarini oshirib borish, moddiy va maʼnaviy qoʻllab-quvvatlash, sogʻlom raqobat ishchi muhitini yaratish, tashabbuskorligiga keng yoʻl ochish, ijodiy qiziqishlarini ragʻbatlantirish borasida chora-tadbirlar belgilanib kelinmoqda. Ulardan biri sifatida 2022-yilda “Fidoyi ayol xodima” koʻrik-tanlovini tashkillashtirish va oʻtkazish boʻyicha qabul qilingan nizomni qayd etish lozim. Zotan, bu nizom asosida har yili ushbu tadbir muvaffaqiyatli oʻtkazib kelinmoqda. Uning uzviy davomi sifatida joriy yilning yanvar oyida poytaxt ichki ishlar organlarida xizmat olib borayotgan xodimalar ishtirokida navbatdagi koʻrik-tanlov oʻtkazildi. Unda 21 nafar ayol xodimalar qatnashdi.

4 bosqichda oʻtkazilgan bahs-munozaralarning 1-bosqichida “Ishtirokchilarning jismoniy tayyorgarligi darajasini aniqlash shartlari: kuch ishlatish kompleks mashqlarini bajarish va 1000 metr masofaga yugurish”; 2-bosqichda “Jangovar tayyorgarlik darajasini aniqlash shartlari: “Makarov” pistoletini toʻliqsiz qismlarga ajratish va yigʻish mashqlarini bajarish hamda jangovar “Makarov” pistoletidan amaliy oʻq otish, aniq nishonga olish va harakatlanmaydigan nishonga otish tartibi”; 3-bosqichda “Ishtirokchilarning bilim darajasini aniqlashga qaratilgan elektron test sinovlari” va 4-bosqichda “Yakuniy baholash” kabilar oʻrin oldi.

Koʻrik-tanlovning 1-bosqichi Toshkent shahar Yunusobod tumanida joylashgan IIBB Sport majmuasining sport zali va stadionida, 2 va 3-bosqichlar IIBB MMIvaKBTXda oʻtkazildi. Musobaqa hakamlari ishtirokchilarning belgilangan shartlarni bajarish jarayonlarini adolatli va xolisona kuzatib va baholab borib, uning yakuniga koʻra faxrli 1-oʻringa Yakkasaroy tumani IIO FMB Tashkiliy boʻlim Tezkor boshqaruv markazi operatori, safdor Lobar Rahmonovani loyiq deb topdi. 2-oʻringa Uchtepa tumani IIO FMB inspektori, katta leytenant Diyora Urozqulova, 3-oʻringa Yangihayot tumani IIO FMB huzuridagi Tergov boʻlimi katta surishtiruvchisi, mayor Husnora Qodirova va Yunusobod tumani IIO FMB huzuridagi Tergov boʻlimi boʻlinmasi katta surishtiruvchisi, katta leytenant Dilshoda Xujanova munosib deb topildi.

Bu kabi tadbirlarning uzviy davomi sifatida joriy yilning 23 yanvarida yana bir – xodimalarning intellektual va kasbiy bilim darajasini, maʼnaviy-axloqiy saviyasini, dunyoqarashi va salohiyatini sinash, bilimga intilish va ishtiyoqlarini ragʻbatlantirish maqsadida, “Zakovat” intellektual oʻyini oʻtkazildi. Bilimlar bahsida 15 ta bilimdon xodimalar jamoasi ishtirok etdi. Qizgʻin va joʻshqin tarzda oʻtgan bahslar hakamlarda ham katta taassurot qoldirdi. Hakamlar bir ovozdan 1- oʻringa Bosh boshqarma Tibbiyot boʻlimi jamoasini, 2-oʻringa Chilonzor tumani IIO FMB jamoasi, 3-oʻringa Bektemir tumani IIO FMB jamoasini loyiq deb topildi. Har ikki musobaqa va bahslarda ishtirok etib, gʻoliblikni qoʻlga kiritgan xodimalar va jamoalarga tegishli diplom va qimmatbaho sovrinlar tantanali ravishda topshirildi.

Toshkent shahar IIBB Axborot xizmati