IIV akademiyasida bugungi islohotlar davrida yosh kadrlarning oʻrni va vazifalariga bagʻishlangan davra suhbati boʻlib oʻtdi
2025-01-21 10:55:00 / Yangiliklar
Bitiruvchi kursantlar va ixtisoslik kafedralari oʻqituvchilari ishtirok etgan tadbirda Toshkent shahar IIBB boshligʻi oʻrinbosari – maʼnaviy-maʼrifiy ishlar va kadrlar bilan taʼminlash xizmati boshligʻi, polkovnik Aliahmed Choriyev soʻz oldi.
Uchrashuvda ichki ishlar organlari tizimida kadrlar siyosatining ustuvor yoʻnalishlari, sohadagi islohotlarning dolzarb talablari, tizimni yuqori malakali kadrlar bilan taʼminlash masalalari haqida soʻz bordi.
Sohaviy xizmat boshligʻi tizim faoliyatini samarali tashkil etish kadrlar salohiyati bilan bogʻliq muhim jarayon ekanligini alohida taʼkidladi. Koʻp yillik amaliy tajribasidan kelib chiqib, akademiyani tamomlayotgan kursantlarga tavsiyalar berdi.
– Barchangiz katta hayot ostonasida turibsiz. Oʻqishni bitirgandan soʻng turli hududlarga, el-yurt xizmatiga yoʻl olasizlar. Kasb masʼuliyati va mashaqqatlaridan hech qachon choʻchimang. Sharafli kasbni qadrlab, halol va vijdonan ishlasangiz, xizmat pillapoyalaridan yuqorilab boraverasiz, – dedi polkovnik A. Choriyev
Uchrashuvda Toshkent shahar IIBBda maʼnaviy-maʼrifiy va kadrlar yoʻnalishida amalga oshirilayotgan ishlar, sohaviy xizmatlarni yuqori malakali kadrlar bilan taʼminlashga qaratilgan chora-tadbirlar xususida fikr almashildi.
IIV akademiyasi Axborot xizmati