“14-yanvar – Vatan himoyachilari kuni” munosabati bilan Olmaliq shahridagi Malaka oshirish instituti kasbiy tayyorgarlik fakulteti tinglovchilari, Islom Karimov nomidagi Davlat texnika universiteti talabalari, Olmaliq Abu Ali Ibn Sino nomidagi Jamoat salomatligi texnikumi, Olmaliq arxitektura-qurilish texnikumi va Olmaliq Kon- metallurgiya kolleji oʻquvchilari oʻrtasida sportning “Mini futbol” turi boʻyicha “Ichki ishlar vazirligi Malaka oshirish instituti boshligʻi kubogi” musobaqasi boʻlib oʻtdi.

Mazkur musobaqada 5 ta jamoa ishtirok etishdi.

Murosasiz va qizgʻin bellashuvlarning yakuniy natijalariga koʻra, uchinchi oʻrinni Olmaliq Kon-metallurgiya kollejining “Metallurg” jamoasi, ikkinchi oʻrinni Islom Karimov nomidagi Davlat texnika universitetining “Texnika” jamoasi va faxrli birinchi oʻrinni Institut kasbiy tayyorgarlik fakultetining “Vatanparvarlar” jamoasi qoʻlga kiritdi.

Shuningdek, nominatsiyalar boʻyicha musobaqaning “Eng yaxshi hujumchi” nominatsiyasiga I.Karimov nomidagi Davlat texnika Universiteti talabasi Shoxjaxon Abdulxayev, “Eng yaxshi darvozabon” nominatsiyasiga Institut KTF tinglovchisi, safdor Jumanazar Xudoyqulov sazovor boʻldilar.

Barcha gʻolib va sovrindorlarga Institut boshligʻining kubogi, medallar va diplomlar hamda qimmatbaho esdalik sovgʻalar bilan taqdirlandilar.

Institut tinglovchilaridan tashkil topgan maxsus guruh qoʻl jangi usullari bilan koʻrgazmali chiqishni namoyon etishdi.

IIV Malaka oshirish instituti Matbuot xizmati