O‘zbеkiston Rеspublikаsi Ichki ishlаr vаzirligi

Xotin-qizlar bilan bogʻliq muammolarni oʻrganadigan va ularga yechim topadigan qator tashkilotlar bilan birga, ichki ishlar organlaridagi xotin-qizlar masalalari boʻyicha inspektorlarning zimmasiga ham katta masʼuliyat yuklangan. Negaki, ayni masalalar negizida yuzaga kelayotgan oilalardagi qaltis vaziyatlar, nizolar, kelishmovchiliklarni bartaraf etish, mazkur jarayonda ayollarimizning qonuniy manfaatlarini himoya qilish muhimdir.

Angor tumani IIB JXX HPB xotin-qizlar masalalari boʻyicha katta inspektor, kapitan Navroʻza Eshpoʻlatova ham xotin-qizlar muammolari masʼul tashkilotlar vakillari, mahalla faollari bilan birgalikda ayollarni muammolarini «xonadonbay» oʻrganib, ularni bartaraf etish choralarini koʻrib kelmoqda.

Hududdagi taʼlim muassasalari, korxona va tashkilotlarda «Biz zoʻravonlikka qarshimiz!» shiori ostida davra suhbatlari oʻtkazilib, ijtimoiy-huquqiy himoyaga muhtoj, tazyiq va zoʻravonlikdan jabrlangan xotin-qizlar murojaatlari oʻrganilmoqda. Ogʻir vaziyatlarga tushib qolgan 16 nafar xotin-qiz tuman tibbiyot birlashmasidagi «Birlamchi koʻmak» xonalariga hamda ijtimoiy reabilitatsiya markazlariga joylashtirildi. Ularga psixologik yordam koʻrsatilib, imkon qadar sogʻlom turmush tarziga qaytarish choralari koʻrilayotir.

— Oʻtgan yilda tazyiq va zoʻravonlikdan jabrlangan 127 nafar xotin qizga tuman IIB HPB profilaktika inspektorlari tomonidan himoya orderi berilib, oilada kelib chiqqan nizolar bartaraf etildi, — deydi kapitan Navroʻza Eshpoʻlatova. — Xotin-qizlar oʻrtasida jinoyatchilik va huquqbuzarliklarning oldini olish maqsadida ogʻir ijtimoiy ahvolga tushib qolganlarning ish bilan taʼminlanishiga yaqindan koʻmaklashilyapti. Xususan, 3456 nafar xotin-qiz «Ayollar daftari», «Temir daftar», «Yoshlar daftari»ga kiritilgan boʻlib, shundan 2707 nafarining bandligi taʼminlangan.

2024-yilda tumanda 934 ta notinch va nizoli oila mavjud boʻlib, ular bilan olib borilgan profilaktik chora-tadbirlar natijasida 741 ta oilaning nizosi bartaraf etilishiga erishildi.

... Asila kelinlik uyidagi odatlarga biroz koʻnikolmadi. Qanchalik harakat qilmasin, qaynonasining koʻngliga yoʻl topolmadi. Bu holat turmush oʻrtogʻi bilan munosabatlariga ham taʼsir qilmay qolmadi. Yaxshi boʻlib ketar ilinjida yashab yurib, farzandli ham boʻldi. Ammo ahvol battar yomonlashdi. Eri kunora qaynona kelinning tortishuvlaridan bezib, ichkilikka berildi. Yaxshigina kira qilib yuradigan ishini ham tashladi. Yetishmovchilik esa nizolarni kuchaytirdi. Yomoni, Sherzod xotinini uradigan odat chiqardi. Sabr kosasi toʻlgan Asila xotin-qizlar masalalari boʻyicha katta inspektorga murojaat qilgach, unga himoya orderi berildi. Mahalla profilaktika inspektori Sherzodga himoya orderi shartlarini buzsa, unga qonuniy chora koʻrilishi mumkinligini tushuntirgach, ahvol biroz oʻnglandi.

— Oilani saqlab qolish oson ish emas. Bunga har ikkala tomonning ham munosabati taʼsir qiladi, — deydi kapitan Navroʻza Eshpoʻlatova. — Biz imkon qadar murosa yoʻli bilan nizolarni bartaraf etishga harakat qilamiz. Ammo baʼzi hollarda oʻzini haq deyishdan nariga oʻtmaydiganlarning ortiqcha harakatlarini esa qonun yoʻli bilan cheklashga majbur boʻlamiz. Har holda, bu nizolarning biroz boʻlsa-da, kamayishiga yordam beradi.

Feruza RAHMONQULOVA, oʻz muxbirimiz.
Surxondaryo viloyati.