Yangi yil bayrami arafasida Surxondaryo viloyati ichki ishlar homiyligi asosida ijtimoiy himoyaga muhtoj fuqarolarga zamonaviy, yangi uylar qurilib foydalanishga topshirildi
2025-01-02 08:35:00 / Yangiliklar
Davlatimiz rahbarining tashabbusi va bevosita koʻrsatmalariga asosan yurtimizda “Kambagʻallikdan farovonlik sari“ dasturi hayotga tatbiq etilmoqda. Surxondaryoda bunday ezgu amallar ijrosiga tizimli yondashilmoqda.
Bugun, viloyat IIB masʼulligida Sherobod tumanida qurib bitkazilgan 30 ta 2 sotixli yangi zamonaviy uy-joylar Sherobod, Angor va Muzrabot tumanlarida yashovchi ijtimoiy himoyaga muhtoj, nogironligi boʻlgan oilalarga topshirildi.
Tadbirda Surxondaryo viloyati hokimi, sektor rahbarlari ishtirok etib, barchani Yangi yil bayrami bilan qutladi hamda Prezidentimizning tashabbuslari bilan amalga oshirilayotgan xalqchil islohotlar natijasida bugun 30 ta oila oʻz uy-joylariga ega boʻlishayotganligini taʼkidlab, oilalar Yangi yilni oʻz uylarida kutib olishlarini bildirdi. Qurilish bunyodkorlik ishlarining boshida turgan IIO xodimlarining mehnati eʼtirof etildi. Shuningdek, “Yagona ijtimoiy reyestr”dagi oilalarning farzandlariga Yangi yil bayrami sovgʻalari topshirildi.
Yangi tashkil etilgan Yangi hayot mahalla markazida — savdo va xizmat koʻrsatish nuqtalari, kitob doʻkoni, tibbiyot maskani, jami 21 ta umumiy hajmi 40 tonna boʻlgan intensiv baliqxona, bundan tashqari 3 ta 50 tonnalik koʻl foydalanishga topshirildi.
Ushbu loyihalarning barchasida ijtimoiy himoyaga muhtoj oilalarning ishsiz aʼzolari bandligi taʼminlashga xizmat qiladi.
Tantanali tadbirda soʻz olgan nuroniylar Prezidentimizning bagʻrikenglik siyosati hamda xalqimizga gʻamxoʻrligi sabab oilalar kambagʻallikdan chiqib, farovon turmush tarziga oʻtayotganligi uchun davlatdan minnatdor ekanliklarini taʼkidlashdi.