Buxoro viloyati ichki ishlar boshqarmasi boshligʻi podpolkovnik Ikromjon Tursunovning navbatdagi oʻrganish ishlari Shofirkon tumanida davom etdi
2024-12-20 13:10:00 / Yangiliklar
Viloyat 3-sektor rahbari, Ichki ishlar boshqarmasi boshligʻi podpolkovnik Ikromjon Tursunov Shofirkon tumanida boʻlib, ijtimoiy soha obyektlari, korxona va tashkilotlar hamda taʼlim muassasalarida, shuningdek, aholi xonadonlarida elektr energiyasi hamda issiqlik taʼminotining qay darajada taʼminlanganligini joyiga borib koʻzdan kechirdi.
Viloyat hamda tuman masʼullari ishtirokida oʻtkazilgan oʻrganishlar davomida yuqorida sanab oʻtilgan obyektlarda qishki mavsumga koʻrilgan tayyorgarlikning holati, koʻmir zaxirasi, qozonxonalar va isitish tizimining holati, yuzaga kelishi mumkin boʻlgan favqulodda vaziyatlarda qoʻshimcha texnik vositalar (generator) bilan taʼminlanganlik holati birma-bir koʻrikdan oʻtkazildi.
Bundan tashqari, tumanda qish mavsumini betalafot oʻtkazish boʻyicha tashkil etilgan tezkor shtab faoliyati ham oʻrganildi.
Jarayonda huquq-tartibot idoralari, hokimlik, kommunal-tezkor xizmatlar masʼullari hamda issiqlik energiya korxonalari rahbarlarining hisobotlari eshitildi.
Tadbir jarayonida aniqlangan barcha kamchiliklar tanqidiy muhokama qilinib, aholiga sifatli xizmat koʻrsatish, energiya resurslaridan noqonuniy foydalanish bilan bogʻliq sodir etilishi mumkin boʻlgan huquqbuzarlik hamda jinoyatlarni aniqlash maqsadida tezkor hamda profilaktik tadbirlarni jadallashtirish borasida topshiriqlar berildi.
Ichki ishlar boshqarmasi boshligʻining oʻrganishlari Buxoro viloyatining barcha hududlarida davom ettiriladi.
Buxoro viloyati IIB Axborot xizmati