Mamlakatimizda yoshlar maʼnaviyatini yuksaltirish va ularning boʻsh vaqtini mazmunli tashkil etish boʻyicha “Besh tashabbus olimpiadasi” doirasida yoshlarni jismoniy chiniqtirish, ularning sport sohasidagi qobiliyatini namoyon qilishlari uchun bir qator tadbirlar amalga oshirilmoqda. Jumladan, Qarshi shahridagi olimpiya va paralimpiya zaxiralari maktabida “Besh tashabbus olimpiadasi” doirasida oliy taʼlim muassasalari talabalari oʻrtasida sportning voleybol turi boʻyicha musobaqasining Respublika final bosqichi boʻlib oʻtdi.

Qizgʻin va murosasiz ruhda kechgan voleybol musobaqasining oʻgʻil bolalar oʻrtasidagi bahslarda 1-oʻrinni Samarqand viloyatidagi Oʻzbekiston-Finlyandiya pedagogika instituti talabalari qoʻlga kiritdi. Navbatdagi sovrinli oʻrinlarni Buxoro davlat universiteti va Jizzax davlat pedagogika universiteti talabalari band etishdi.

Qiz bolalar oʻrtasida kechgan voleybol oʻyinlarida Buxoro davlat universiteti talabalari barcha raqiblarini dogʻda qoldirib gʻoliblik shohsupasidan joy oldi. 2-oʻrinni esa Guliston davlat universiteti va 3-oʻrinni mezbon jamoa Qarshi davlat universitetining voleybolchi qizlari qoʻlga kiritdi.

Gʻoliblar kubok, diplom va medallar bilan taqdirlandi.

Qashqadaryo viloyati IIB Axborot xizmati