Surxondaryo viloyati IIB boshligʻi polkovnik Timur Ismailovning navbatdagi “Ommaviy sayyor qabuli” boʻlib oʻtdi
2024-11-07 09:00:00 / Yangiliklar
Oʻzbekiston Respublikasi Prezidentining Surxondaryo viloyatidagi Xalq qabulxonasi binosida Surxondaryo viloyati IIB boshligʻi tomonidan oʻtkazilgan qabulda, viloyat Ichki ishlar boshqarmasi boshligʻining oʻrinbosarlari, tegishli sohaviy xizmat rahbarlari ishtirok etishdi.
“Ommaviy sayyor qabuli” jarayonida fuqarolar tergov — surishtiruv, ishga qabul qilish, IIV tizimiga ishga tiklash, yoʻl harakati xavfsizligi, fuqarolikni rasmiylashtirish, quda-andalar oʻrtasidagi nizolarga barham berish, uy-joyni nomiga rasmiylashtirish, pul oldi berdi masalasi va boshqa turli ichki ishlar sohasiga oid masalalar yuzasidan murojaatlar qilishdi.
Murojaatlarning asosiy qismi shu yerning oʻzida ijobiy hal etilgan boʻlsa, baʼzi murojaatlar yuzasidan huquqiy tushuntirishlar berildi.
Ijrosini oʻrganish uchun qoʻshimcha muddat talab qiladigan murojaatlar esa tegishli sohaviy xizmat masʼullariga yoʻnaltirilib, boshqarma boshligʻi tomonidan alohida nazoratga olindi.
Shuningdek, “Ommaviy sayyor qabuli” davomida ichki ishlar organlari tizimida kasbiga sodiqlik va halollik bilan yondashgan holda xizmat qilayotgan tergov va surishtiruvchilarning faoliyatlaridan mamnunligini bildirgan fuqarolar ham ishtirok etishib, oʻz minnatdorchiliklarini izhor etishdi.
Surxondaryo viloyati IIB Axborot xizmati