Tadbirda Toshkent shahar huquqni muhofaza qiluvchi organlar va shahar hokimiyati rahbariyati, bosh boshqarma va tarkibiy tuzilmalar xodimlari ishtirok etdi.

Orkestr sadolari ostida boshlangan marosimda davlatimiz rahbari topshirigʻi bilan xizmatda foydalanish uchun 8 ta BYD va 15 ta Damas avtotransport vositalari sohaviy xizmat xodimlariga tantanali ravishda topshirildi. Taqdim etilgan mazkur transport vositalari sohaning moddiy-texnik bazasini yanada mustahkamlash va xizmat sifatini yaxshilashda oʻz hissasini qoʻshishi bilan ahamiyatli boʻldi.

Taqdimotdan keyin Toshkent shahar IIBBda joylashgan xotira maydonida xizmat burchini ado etish vaqtida halok boʻlgan ichki ishlar organlari xodimlarining yorqin xotirasi yod etildi. Marosimda ichki ishlar organlari faxriylari, mehmonlar, bosh boshqarma rahbariyati va shaxsiy tarkib hamda vatan uchun qahramonlarcha jon fido etgan xodimlarning oila aʼzolari va yaqinlari ishtirok etishdi. Xotira monumentiga gullar qoʻyildi.

Shundan soʻng, Bosh boshqarmaning maʼrifat zalida bayram tadbirining tantanali marosimi boshlandi. Unda Toshkent shahar IIBB boshligʻi tomonidan Ichki ishlar vazirining bayram tabrigi oʻqib eshittirildi.

Bosh boshqarma boshligʻi general-mayor Aziz Tashpulatov ichki ishlar organlari xodimlarini, faxriylarni hamda xizmat vaqtida qahramonlarcha halok boʻlgan xodimlarning oila aʼzolarini bayram bilan tabriklab, ularga muvaffaqiyatlar tiladi.

Tadbir davomida oʻz xizmati bilan kasbdoshlariga oʻrnak boʻlgan bir qator xodimlar Ichki ishlar vaziri, Toshkent shahar IIBB boshligʻi va boshqa huquqni muhofaza qiluvchi organlar rahbarlarining koʻkrak nishoni, faxriy yorligʻi va esdalik sovgʻalari bilan taqdirlandi.

Bayram soʻngida qatnashchilar uchun konsert dasturi namoyish etildi.

Toshkent shahar IIBB Axborot xizmati