Jizzax viloyati ichki ishlar boshqarmasida Ichki ishlar vazirining oʻrinbosari, general-mayor Davron Nazarmuxamedov soha faxriylari bilan muloqot oʻtkazdi.

Viloyat ichki ishlar boshqarmasining maʼnaviy-maʼrifiy ishlar va kadrlar bilan taʼminlash xizmati, hududiy ichki ishlar boshqarma va boʻlimlari boshliqlarining maʼnaviy-maʼrifiy ishlar boʻyicha oʻrinbosarlari ham ishtirok etgan yigʻilishda vazir oʻrinbosari mamlakatimizda keksalarga, jumladan, soha faxriylariga koʻrsatilayotgan eʼtibor va gʻamxoʻrliklar haqida soʻz yuritdi.

Chunonchi, oktyabr oyining boshida uyushtirilgan “Keksalar haftaligi” doirasida amalga oshirilgan ishlar hamda noyabr — keksalar uchun turizm oyida oʻtkazilajak tadbirlar tilga olindi.

Xuddi shunday, Toshkent shahri, Qoraqalpogʻiston Respublikasi va viloyatlar ichki ishlar organlari faxriylar kengashlarining faoliyati, xususan, joriy qilingan ilgʻor tajribalar yuzasidan fikr almashildi.

Oʻz navbatida Jizzax viloyati ichki ishlar boshqarmasi faxriylar kengashi masʼullarining joriy yilning oʻtgan davriga oid hisoboti tinglandi. Shundan soʻng keksalarning talab, takliflari eshitildi.

Ushbu jarayonda faxriylarni ijtimoiy qoʻllab-quvvatlash, Jizzax viloyati ichki ishlar boshqarmasi tibbiyot boʻlimida shifokorlar tarkibini kengaytirish, ajratiladigan dori-darmonlar miqdori va sanatoriylarga yoʻllanmalarni koʻpaytirish kabi bir qator masalalar koʻtarildi.

Shuningdek, ustoz va shogird anʼanasini kuchaytirish, faxriylarning hayotiy tajribasi va bilimlaridan ichki ishlar organlari va mahalla fuqarolar yigʻinlari faoliyatida keng foydalanish, keksalar oʻrtasida maʼnaviy-maʼrifiy tadbirlar uyushtirish, ularni qoʻllab-quvvatlash maqsadida jamgʻarma tashkil qilish boʻyicha takliflar bildirildi.

Maʼlumot oʻrnida aytish kerak, Ichki ishlar vazirining oʻrinbosari, general-mayor Davron Nazarmuxamedov bunday muloqotlarni respublikamizning barcha hududlarida oʻtkazmoqda.

Jizzax viloyati IIB Axborot xizmati