Oʻzbekiston Respublikasi Ichki ishlar vaziri general-leytenant Poʻlat Bobojonovning 1-oktyabr – Oʻqituvchi va murabbiylar kuni munosabati bilan bayram tabrigi
2024-10-01 06:30:00 / Yangiliklar
Qadrli ustoz-murabbiylar!
Taʼlim-tarbiya sohasining jonkuyar, fidoyi xodimlari va faxriylarini barchamiz eng eʼzozlagan bayramlardan biri – Oʻqituvchi va murabbiylar kuni bilan samimiy tabriklayman.
Bugungi kunda ichki ishlar organlarini chuqur bilim va salohiyatga ega, yetuk kadrlar bilan taʼminlash, har tomonlama barkamol yoshlarni tarbiyalash, ularga kasb sirlarini oʻrgatish, vatanparvar, jasur va sadoqatli yurt oʻgʻil-qizlarini kamolga yetkazishdek masʼuliyatli vazifani tizimda faoliyat yuritayotgan ustoz va murabbiylarimiz sharaf bilan ado etib kelmoqdalar.
Muhtaram Prezidentimiz Shavkat Miromonovich Mirziyoyev: “Muallimning obroʻ-eʼtibori – bu avvalo, millatning, butun xalqning obroʻ-eʼtiboridir. Shu bois, biz keyingi yillarda oʻqituvchi va murabbiylarning jamiyatimiz hayotidagi oʻrni va taʼsirini kuchaytirish, taʼlim tizimini zamon talablari asosida tashkil etish boʻyicha ulkan islohotlarni amalga oshirmoqdamiz” – deya taʼkidlaganlar.
Bu borada yurtimiz taʼlim sohasini tubdan rivojlantirish, oʻqituvchi va murabbiylarning nufuzini yanada yuksaltirish, ularga xalqaro standartlar asosida sharoit va imkoniyatlar yaratib berish, islohotlar orqali esa, Oʻzbekistonda yangi Uygʻonish davri, yaʼni Uchinchi Renessans poydevorini barpo etish sari jadal bormoqdamiz.
Taʼlim sohasida mehnat qilayotgan barcha professor-oʻqituvchilar qatorida ichki ishlar organlari tizimida faoliyat koʻrsatayotgan aziz ustoz-murabbiylarimiz ham oʻzining bor kuch va salohiyatini, bilim va tajribasini safarbar etib, yurtimizda amalga oshirilayotgan islohotlar rivojiga munosib hissa qoʻshishlariga ishonamiz.
Darhaqiqat, bugungi islohotlar shiddati, koʻzlangan maqsadlar roʻyobi ustoz va murabbiylardan ham chinakam vatanparvarlikni, ulkan fidoyilikni talab qiladi. Eng sharafli kasb egasi boʻlgan oʻqituvchi va murabbiylar hamisha eʼtibor va eʼzozga munosibdir.
Fursatdan foydalanib, ichki ishlar organlarida ilm-fan, taʼlim-tarbiya sohalarini rivojlantirish, yoshlarga zamon talablari asosida bilim berish, ularda yuksak maʼnaviy-axloqiy fazilatlarni kamol toptirish, xodimlarimizni qasamyodga sadoqat ruhida tarbiyalash ishlariga kamarbasta boʻlayotgan faxriylarimiz, aziz ustoz va murabbiylarimizni ushbu ayyom bilan tabriklab, ularga uzoq umr, sihat-salomatlik, baxt-saodat, kelgusi faoliyatlarida ulkan zafarlar tilayman.
Vazir general-leytenant P.R.Bobojonov