Oramizda bilib-bilmay jinoyat koʻchasiga kirib qolganlar ham yoʻq emas, albatta. Zero, adashganlarga imkon berish, kechirimlilik va ularni yaxshi maʼnoda qoʻllab-quvvatlash bagʻrikeng xalqimizga yuqtirilgan insoniy fazilatlarning bir koʻrinishidir.

— Ayni paytda hududimiz boʻyicha jami 426 nafar nazoratdagi shaxs jazo muddatini oʻtab kelmoqda, — deydi Oqdaryo tumani IIB JXX Probatsiya guruhi katta inspektori, kapitan Elyor Jabborov. — Shundan 103 nafarini axloq tuzatish ishlari, 7 nafarini shartli hukm qilinganlar, 51 nafarini muayyan huquqdan mahrum qilinganlar, 101 nafarini ozodlikni cheklash, 164 nafarni muddatidan ilgari shartli ozod etilganlar tashkil etadi. Bugungi kunga qadar tuzalish yoʻliga oʻtgan 113 nafar nazoratdagi shaxs esa muddatidan ilgari shartli ravishda ozod etildi. Ularning jamiyatda faol ishtirokini taʼminlash yana qayta jinoyat sodir etmasligining oldini olish maqsadida kerakli profilaktik ishlar olib borilmoqda.

Oqdaryo tumanida “Ishga marhamat” mehnat yarmarkasi, “Tadbirkor va yoshlar uchrashuvi” singari tadbirlarda hisobda turgan, nazoratdagi yoshlarning bandligini taʼminlashga alohida eʼtibor qaratilmoqda. Jumladan, yaqin kunlarda boʻlib oʻtgan mehnat yarmarkasida otaliqqa olingan yoshlardan Siroj Radjabov, Feruz Maxmudov, Zafar Tolibov va Nurmuhammad Samandarovlar ishli boʻldi.

- Xato qilmaslik uchun har bir qadamni oʻylab bosish kerak ekan, — deydi Nurmuhammad Samandarov. — Boʻlmasa xato qilib, jabrini insonning oʻzi tortarkan. Men ham bilib-bilmay jinoyat koʻchasiga kirib qoldim. Va qilmishimga yarasha jazo tayinlandi. Aybimga iqrorlik, qilgan qilmishga pushaymonlikda jazo muddatining yarmini panjara ortida oʻtkazdim. Keyin jazoim yengillashtirilib, axloq tuzatish ishlari jazosi tayinlandi. Buning uchun hukumatimizdan nihoyatda minnatdorman. Hozirda poliz mahsulotlari yetishtiriladigan “Islom Xudoyqulov” fermer xoʻjaligida ishlayapman.

Ha, inson koʻngliga halollik, toʻgʻrilik va mehnatsevarlik xotirjamlik bagʻishlaydi. Bugun oramizda kimlardir oʻzining qilgan xatolarini anglab yetib, toʻgʻri yoʻlni tanlab, hayotini iziga solayotgani yaxshi holat. Zotan, Nurmuhammad singari qalb amri bilan halovatga intilib, mehnat qilayotganlarning har bir amalida tuman IIB Probatsiya guruhida xizmat olib borayotgan fidoyi xodimlarning hamda mutasaddilarning munosib oʻrni bor.