Toʻyxat oʻrnida. Yangilikka intilib
2024-09-25 12:10:00 / Yangiliklar
Baxtni har bir inson oʻzicha tushunadi. Binobarin, uning formulasini ham oʻzi yaratadi. Baxtni yurt ravnaqi yoʻlida xizmat qilish, har bir kunni xayrli aʼmollar bilan oʻtkazishni haqiqiy baxt deb bilgan insonlardan biri Agzam Rahimovdir.
Agzam Rahimov 1959-yil 23-sentyabrda Toshkent shah rida tugʻilgan. Maktabni tugatgandan soʻng bir muddat V. Chkalov nomidagi Toshkent Aviatsiya ishlab chiqarish birlashmasi obyektlarini yongʻindan saqlovchi 1-otryadining oʻt oʻchiruvchisi lavozimida xizmat qiladi.
Harbiy xizmatdan qaytgach, Toshkent shahar IIB YOSB tizimida ishlaydi. 1989-yilda sobiq ittifoq IIV Yongʻin-texnik oliy maktabi Toshkent fakultetining kunduzgi boʻlimini tugatib, xizmatni IIV YOXBda davom ettiradi.
U xizmat faoliyati davomida koʻplab ustozlaridan mashaqqatli kasb sirlarini oʻrgandi. Oʻzi bilan birga boshqarmada xizmat qilayotgan hamkasblari M. Ibrohimov, A. Qoʻldoshev, T. Azimov, V. Makarov, Yu. Turdiyev, M. Mirfayziyev, B. Karimov, A. Ismoilov va boshqa zobitlar bilan yelkama-yelka turib yongʻinlarga yoʻl qoʻymaslikka va sodir boʻlganlarini kam talofat bilan bartaraf etishda oʻz hissasini qoʻshdi.
1997-yil oʻzi xizmat qilayotgan boʻlimga rahbar etib tayinlangandan soʻng yongʻin oʻchirish texnikasi va aloqa vositalaridan foydalanish, ularga oʻz vaqtida texnik xizmat koʻrsatish boʻyicha MDH va xorijiy davlatlardagi yangiliklar va ularni bizning sharoit va talablarga moslagan holda hayotga tatbiq etish, bino va inshootlarni kapital taʼmirdan chiqarish masalalari bilan shugʻullandi, ilgʻor tajribalarni respublika miqyosida tatbiq etishga harakat qildi. Bundan tashqari, har ikki yilda bir marotaba oʻt oʻchirish avtomobillari haydovchilari oʻrtasida oʻtkaziladigan “Oʻt oʻchirish avtomobilining eng yaxshi haydovchisi” nomidagi respublika musobaqasini oʻtkazilishini qayta yoʻlga qoʻydi hamda bir qancha meʼyoriy hujjatlarni qayta ishlab chiqishda bosh-qosh boʻldi.
Ichki ishlar organlarida salkam 30-yil xizmat qilib, podpolkovnik unvonida pensiyaga chiqqan lavhamiz qahramoni xizmat faoliyati davomida koʻplab shogirdlarni tarbiyaladi. U. Avazbekov, B. Adilov, B. Alibekov, F. Turdiyev, B. Navruzov, F. Dadaboyev va boshqa shogirdlari hozirgi kunda nafaqada boʻlsa ham, respublikamiz xalq xoʻjaligining turli jabhalarida yongʻin xavfsizligini taʼminlash boʻyicha mehnat qilishmoqda.
Agzam 2006-yil iyun oyida Oʻzbekiston-Kanada qoʻshma korxonasiga qarashli boʻlgan “Qurilish texnologiyalari” nomli tashkilotda yongʻin xavfsizligi muhandisi lavozimida, 2007-yil oktyabr oyidan esa “ABU SAXIY savdo markazi” MCHJga yongʻin xavfsizligi inspektori lavozimiga ishga taklif qilindi. Uch oydan soʻng jamiyatda malakali yosh, isteʼfoga chiqqan xodimlar bilan jamlangan Yongʻin xavfsizligi xizmati tashkil etildi va bu yangidan tuzilgan xizmatga 12-yil rahbarlik qildi.
2019-yil sentyabr oyidan boshlab to shu kungacha Oʻzbekiston Respublikasi “Tashkent City” majmuasiga kiruvchi “Xalqaro Kongress Markazi” binosiga xizmat koʻrsatuvchi “SKY EVENTS” MCHJda mehnat qilib kelmoqda.
Turmush oʻrtogʻi Dilfuzaxon bilan ikki nafar qiz va bir oʻgʻilni voyaga yetkazgan faxriymiz hozirgi kunda 10 nafar nabiraning suyukli bobosi va buvisi boʻlib baxtli umr kechirishmoqda.
Shu kunlarda oʻzining 65 yoshini qarshilayotgan Agzam Rahimovning yurt ravnaqi yoʻlidagi fidoyiliklari, xayrli aʼmollari bardavom boʻlishini tilab qolamiz.
Qodirjon Joʻrayev, isteʼfodagi podpolkovnik. “Postda”