1-oktyabr — Oʻqituvchi va murabbiylar kuni. Masʼuliyatni his etib
2024-09-24 08:15:00 / Yangiliklar
IIV Transportda va turizm obyektlarida xavfsizlikni taʼminlash departamenti “Uzbekistan UzAuto Motors AJ” yuklarini kuzatish boʻyicha “Asaka” bekatidagi 1-otryadi shaxsiy tarkibi avtomobil zavodida ishlab chiqarilgan avtomobillar va ular uchun ehtiyot qismlar kabi yuklarni kuzatib borish va butligini saqlashdek masʼuliyatli vazifalarni bajaradi.
- Naryadlar texnika yuklangan eshelonlarni kuzatib borishadi, — deydi guruh komandiri, katta serjant Azizbek Yulbarsov. — Yoʻlda xodimlar qimmatbaho yuklarni ehtiyot qilib, muhrlar butligini nazorat qilishadi, qoʻriqlanayotgan obyektga begona shaxslarning kirishiga yoʻl qoʻymaslik uchun profilaktik choralarni koʻrishadi.
Taʼkidlash joizki, boʻlinmaning butun shaxsiy tarkibi noodatiy vaziyatlarda harakatga kirishish koʻnikmalariga ega, xodimlar qoʻl jangi usullarini yaxshi bilishadi va maxsus vositalardan mukammal foydalana oladi. Ular istalgan paytda biriktirilgan obyektga uyushtirilgan bosqin yoki yashirincha kirishni qaytarishga tayyor.
Shaxsiy tarkibning asosiy vazifasi — kuzatib borish yoʻnalishida noxush holatlarning oldini olish va yuk daxlsizligini taʼminlashdan iborat.
Yoʻnalish boʻylab kuzatish naryadlari boʻlinma navbatchi qismi bilan doimiy aloqada boʻlib turadi. Kutilmagan holatlar yuzaga kelganda, darhol navbatchilik qismiga xabar berishadi.
Xodimlar samarali xizmat qilishi uchun zarur sharoitlar yaratilgan. Maʼnaviyat va maʼrifat mashgʻulotlari muntazam oʻtkazilib, shaxsiy tarkib xizmatdan boʻsh vaqtida jismoniy tarbiya va sport bilan shugʻullanish imkoniyatiga ega.
Otryadda “ustoz-shogird” anʼanasi keng yoʻlga qoʻyilgan. Yoshlar birgalikdagi xizmat jarayonida koʻnikma va tajribalari bilan oʻrtoqlashadigan xodimlarga biriktiriladi.
Boris KLEYMAN, oʻz muxbirimiz.
Andijon viloyati.
Suratda: guruh komandiri, katta serjant Azizbek Yulbarsov va safdor Ergashali Yunusov.