Xalqaro aloqalar. Oʻzar hamkorlik yanada rivojlanmoqda
2024-09-21 18:00:00 / Yangiliklar
Ikki qardosh millat-oʻzbek va turk xalqlarining urf-odatlari, dini va madaniyati bir-biriga juda yaqin. Azaliy doʻstlik va uygʻun madaniy aloqalar bu ikki millatni mustahkam bogʻlab turadi. Soʻnggi yillarda Oʻzbekiston va Turkiya oʻrtasida turli sohalardagi aloqalarni yanada rivojlantirishga qaratilgan saʼy-harakatlar ikki davlat munosabatlarini yangi bosqichga olib chiqmoqda.
Yaqinda ichki ishlar vaziri, general-leytenant Poʻlat Bobojonov Oʻzbekistonga rasmiy tashrif bilan kelgan Turkiya Respublikasi ichki ishlar vaziri janob Ali Yerlikaya boshchiligidagi delegatsiya bilan uchrashuv oʻtkazdi.
Ushbu uchrashuv Prezidentimizning joriy yil 6-7-iyun kunlari Turkiya Respublikasiga rasmiy tashrifi davomida erishilgan kelishuvlarga muvofiq amalga oshirildi.
Ichki ishlar vazirligida boʻlib oʻtgan tadbirda ikki davlat ichki ishlar vazirliklarining oʻzaro aloqalari kengayib, transmilliy jinoyatlarga qarshi kurashish hamda jamoat xavfsizligini taʼminlash boʻyicha tizimli hamkorlik yangi bosqichga koʻtarilgani, axborot va oʻzaro tajriba almashish hamda kadrlar malakasini oshirish kabi masalalar amalga oshirilayotgani taʼkidlandi.
Jumladan, professional kadrlarni tayyorlash borasida 2018-yilda Turkiya Politsiya akademiyasi hamda 2022-yilda Jandarmeriya va sohil xavfsizligi akademiyasi va Oʻzbekiston IIV Akademiyasi oʻrtasida imzolangan memorandumlar asosida Turkiya huquqni muhofaza qilish idoralari oʻquv yurtlarining professor-oʻqituvchilari davlatimizda soha kursantlarini tayyorlashda, shuningdek, magistratura tinglovchilariga zamonaviy bilim berish jarayonlarida faol qatnashayotgani taʼlim yoʻnalishidagi aloqalar mustahkamlanayotganidan dalolat ekanligi yana bir bor eʼtirof etildi.
Shuningdek, hamkorlikning alohida yoʻnalishi boʻlgan kiberjinoyatchilikka qarshi samarali kurashish masalasi ham oʻrtaga tashlanib, bu borada ikki tomonlama hamkorlikni kuchaytirish hamda doimiy ravishda oʻzaro tajriba almashib borish muhim ekanligiga urgʻu berildi.
Bundan tashqari, tomonlar terrorizm va ekstremizm, odam savdosi, giyohvandlik moddalarining noqonuniy savdosi hamda boshqa turdagi transmilliy jinoyatlarga qarshi kurashishda hamkorlikni kuchaytirish, kiberjinoyatlarga qarshi kurashish va raqamli kriminalistika yoʻnalishida ichki ishlar organlari xodimlari uchun maxsus oʻquv kurslarini tashkil etish, Vazirlik tarkibida yangi tashkil etilgan Kriminologiya tadqiqot instituti bilan Turkiyaning ichki ishlar vazirligi va Jandarmeriyasiga qarashli ilmiy tadqiqot markazlari oʻrtasida oʻzaro hamkorlikni yoʻlga qoʻyish kabi muhim masalalar muhokama qilindi.
Uchrashuv yakunida hamkorlikni yanada rivojlantirish borasida istiqbolli vazifalar belgilab olindi.
Tashrif doirasida turk qardoshlarimiz poytaxtimiz hamda Samarqand viloyatida turistik obyektlarning xavfsizligini taʼminlash faoliyati bilan ham yaqindan tanishishdi.
©️ “Postda” gazetasi.