Muxbirlarimiz xabar qiladi. Bolaga mehr kerak.
2024-09-15 12:00:00 / Yangiliklar
Samiraning ota-onasi ajrashib ketishgach, opasi ikkalasi onasi bilan qoldi. Roʻzgʻor yuki onasi Fazolatga tushganidan keyin farzandlarini boqish, ularni kiyintirish uchun mablagʻ topishga Rossiyaga ishga ketdi.
Samira onasi ketgach, tushkunlikka tushib qoldi. Buvisining qoʻlida onasiz siqildi. Oilasi oʻrtoqlarinikiday emasligidan ezildi. Vaqtini xushnud oʻtkazish uchun koʻchada koʻp yuradigan, baʼzan uyga kelmaydigan yangi odatlar chiqara boshlagach, buvisi ichki ishlar idoralariga murojaat qildi.
Samirani viloyat IIB JXX HPB Voyaga yetmaganlarga ijtimoiy-huquqiy yordam berish markaziga olib kelishdi. U bilan profilaktik suhbatlar olib borildi.
Ayniqsa, Markazdagi tikuvchilik toʻgaragi unga maʼqul tushdi. Oʻsmir qizga ona tarbiyasi, mehri kerakligini tushungan markaz xodimlari onasi Fazolat opani xorijdan qaytib kelishga koʻndirdi.
Shundan soʻng, Samira yana oilasi, onasining bagʻriga qaytdi. Mehrsiz, qarovsiz, chorasiz qolgan bunday bolalar har doim yordamga muhtoj boʻladi, — deydi markaz psixologi kapitan Mohida Joʻrayeva. — Biz imkon qadar ularga yordam berishga, ruhan qoʻllab-quvvatlashga harakat qilayapmiz.
Shukrki, bu saʼy-harakatlarimiz besamar ketayotgani yoʻq. Chunki qanchadan-qancha bolalarning toʻgʻri yoʻlga solib, yana oilasi bagʻriga qaytishiga erishayapmiz.
Birgina joriy yilning oʻzida markazga nazoratsiz va qarovsiz qolgan 174 nafar voyaga yetmagan keltirilgan boʻlsa, ularning 2 nafari ixtisoslashgan maktabga, 2 nafari oʻgʻil bolalar uchun moʻljallangan yopiq turdagi taʼlim muassasasiga joylashtirildi. Yana 15 nafari vasiylik va homiylik asosida oilalarga berildi. 155 nafari esa oilasiga qaytarildi.
Darvoqe, markazda tarbiyalanuvchilar uchun pazandachilik, sartaroshlik va tikuvchilikni oʻrgatuvchi ustaxonalar tashkil etilgan boʻlib, unda bolalar hunar ham oʻrganayotgani quvonarli.
- Hunar oʻrgangan bolaning mehnatga ishtiyoqi uygʻonadi. Boʻsh vaqtini foydali ishga sarflaydi. Bu esa bolalarning oʻziga boʻlgan ishonchni kuchaytiradi va sogʻlom hayotga qaytishiga yordam beradi, -deydi Mohida Joʻrayeva.
Markazda tarbiyalanib, oilasi bagʻriga qaytgan bolalarning barchasi keyinchalik ham bir yil davomida nazoratda boʻladi. Ularning xulq-atvori, oilasidagi vaziyat doimiy ravishda monitoring qilib boriladi.
Farzand aziz, tarbiyasi undanda aziz deydi xalqimiz. Har bir bolaning yaxshi tarbiya olishi, ilm oʻrganib, kelajakda jamiyatga nafi tegadigan inson boʻlib yetishishi uchun barchamiz masʼulmiz.
©️ “Postda” gazetasi, Feruza Rahmonqulova, Surxondaryo viloyati.