Yuksak mukofot sohiblari. Ishonchga munosib javob
2024-09-12 07:45:00 / Yangiliklar
Toshkent viloyati IIBB Tezkor vazifalarni bajaruvchi safarbar otryadi komandirining jangovar tayyorgarlik boʻyicha oʻrinbosari, mayor Jamoliddin Zikirov yigirma ikki yillik faoliyati davomida fidoyi xizmatlari bilan rahbariyat ishonchini qozonib kelayotgan osoyishtalik posbonlaridan biri. Shu boisdan u istiqlolimizning 33 yillik shodiyonasi arafasida “Jasorat” medali bilan taqdirlandi.
- Yurt koriga yaraydigan farzandni tarbiyalab voyaga yetkazganimizdan doim faxrlanib kelganmiz, — deydi uning otasi Tohirjon aka. — Oʻgʻlimizning yuksak mukofotga loyiq topilgani esa bizni yanada xushnud etdi.
Qoʻl ostidagi shaxsiy tarkibning jismoniy va jangovar tayyorgarlik mashgʻulotlarini bekamu koʻst olib borayotgan lavhamiz qahramoni, maxsus xizmatlar oʻrtasida boʻlib oʻtadigan “Alvon beret” va koʻpkurash musobaqalari hamda mamlakatimiz va dunyo miqyosida oʻtkaziladigan turli sport tadbirlariga ham puxta tayyorgarlik koʻrishiga munosib hissa qoʻshayotir.
Toshkent tumanida dunyoga kelgan Jamoliddin bolaligidan sportning dzyudo turi bilan muntazam shugʻullanib, yurtimiz yoshlari oʻrtasida tashkil etilgan koʻplab xalqaro turnirlarda ketma-ket shohsupaning yuqori pogʻonalaridan joy oldi. Hozirda ham sambo boʻyicha ana shunday muvaffaqiyatlarga erishib kelayotir.
Mamlakatimiz huquqni muhofaza qiluvchi organlari oʻrtasida oʻtkazilgan bellashuvlarda oʻq otish boʻyicha 2 karra gʻoliblikni qoʻlga kiritgan J. Zikirov Markaziy Osiyo davlatlari oʻrtasida Qozogʻistonda boʻlib oʻtgan musobaqada ham “Makarov” pistoletidan oʻq otish bahslarida tengsiz deb topildi.
- Bu muvaffaqiyatlarga erishishimda ustoz va murabbiylarimning oʻrni benihoya kattadir, — deydi mayor J. Zikirov. — Mukofot sohibi boʻlganim zimmamga yanada masʼuliyat yuklaydi. Uni sharaf bilan ado etish davlatimiz va IIV rahbariyati tomonidan bildirilgan ishonchni oqlashga munosib javob boʻladi, deb oʻylayman.
J. Zikirov turmush oʻrtogʻi Naziraxon bilan ikki oʻgʻil va bir qizni tarbiyalab voyaga yetkazmoqda. Oʻgʻillarining har ikkisi ham kelajakda otasi kabi el-yurt tinchligining munosib posbonlari boʻlish uchun maktabdagi fanlarni puxta oʻzlashtirib, sport bilan muntazam shugʻullanmoqda.
Mixli SAFAROV, oʻz muxbirimiz.