Fidoyi hamkasblarimiz. Oʻrnak olsa arziydi
2024-09-09 17:00:00 / Yangiliklar
Navoiy viloyati ichki ishlar organlarida kasbini sevib, ardoqlab, zimmasidagi vazifalarni sidqidildan bajarayotgan xodimlar talaygina. Ulardan hamkasblari har jihatdan oʻrnak olsa arziydi. Quyida sizlarni ana shunday intiluvchan xodimlardan ayrimlari bilan tanishtiramiz.
Karmana tumani IIB huzuridagi Tergov boʻlinmasi tergovchisi, kapitan Gulshoda Hamrayeva ichki ishlar organlaridagi qariyb 10-yillik xizmat faoliyati davomida koʻplab jinoyatlarni ochishga munosib hissa qoʻshib kelyapti. Tabiatan xushchaqchaq, kirishimli lavhamiz qahramoni xizmatda tartib-intizomni, rasmiy munosabatlarda jiddiylikni xush koʻradi. Uning turmush oʻrtogʻi Jamshid Hamrayev adliya sohasida xizmat qilgani bois, oʻzaro huquqiy bilimlar almashinuvi, maqsadlar mushtarakligi har ikkisining ham muvaffaqiyatlariga zamin boʻlmoqda.
Nurota tumani IIB JXX HPB profilaktika inspektori, kapitan Bobur Esanov oʻz kasbidan quvvat oladigan, odamlarning roziligi yoʻlida tinim bilmaydigan fidoyi xodimlardan. U tumanning 3020 nafar aholi istiqomat qiladigan Gʻafur Gʻulom nomli mahallasi tinchlik-osoyishtaligini taʼminlash uchun masʼul. Lavhamiz qahramoni muntazam ravishda olib borayotgan targʻibot-tashviqot tadbirlari natijasida joriy yilda xizmat hududida birorta ham jinoyat sodir etilishiga yoʻl qoʻyilmadi.
U jinoyat sodir etishga moyil, spirtli ichimlikka ruju qoʻygan hamda jazoni ijro etish muassasasidan qaytgan shaxslarning har biri bilan alohida tushuntirish ishlari olib boradi. Ularni ishga joylashtirish, kasb-hunarga oʻqitish choralarini koʻryapti. Mahalla yettiligining boshqa aʼzolari bilan hamkorlikda aholining turli muammolarini hal etishga muvaffaq boʻlishyapti.
Yoʻl harakati xavfsizligi xizmati Axborot xizmati kichik mutaxassisi, safdor Sabina Xodjayeva harakat ishtirokchilarining madaniyatini oshirish maqsadida tinimsiz izlanadi. Shuningdek, ijtimoiy tarmoqlar orqali sohada roʻy berayotgan yangiliklar, rasmiy xabarlar, qoidalarga amal qilishni targʻib qiluvchi koʻplab lavhalar, ijtimoiy roliklar tayyorlab, omma eʼtiboriga havola etadi.
Ikki yildan buyon Navoiy viloyati IIB JXX YHXBning mualliflik dasturi boʻlgan “Avtorakurs” loyihasining efirga uzatilishida munosib hissa qoʻshib kelyapti. U hozirda piyodalar uchun yoʻl harakati qoidalarining media uslubidagi oʻquv qoʻllanmasi ustida ishlamoqda. Mustaqillik bilan tengdosh qahramonimizning kelajakdagi orzu-maqsadlari bisyor.
Har bir sohaning oʻziga xos mashaqqati bor. Ana shunday qiyinchiliklarni sabr-matonat, sobit iroda bilan yengib, soha sir-asrorlarini egallagan, oʻzining mehnati bilan hamkasblarining hurmatini qozongan safdor Jamshid Qoʻchqorov oʻz kasbining jonkuyarlaridan.
U hozirda viloyat IIB JXX JTSB Kinologiya boʻlinmasi kichik inspektor-kinologi lavozimida faoliyat olib bormoqda.
Kasbdoshlarim jonivorlarning tilini tez topishimning siri nimada ekanligini soʻrashadi. Men ularga “Mehr hamma uchun tushunarli til”, deb javob beraman, — deydi Jamshidbek.
U oʻziga biriktirilgan “Yagus” laqabli xizmat iti bilan birgalikda koʻplab oʻgʻrilik va giyohvandlik vositalari bilan bogʻliq jinoyatlarni fosh etishga hissa qoʻshishdi.
©️ “Postda” gazetasi, Mahliyo Xolova, Navoiy viloyati.