Sulola. Ota kasbini ulugʻlaganlar
2024-09-07 12:35:00 / Yangiliklar
Koʻp yillar ichki ishlar organlarida faoliyat yuritgan katta serjant Usmonali Umarovning bir emas, ikki emas, uch nafar farzandi ota izidan ketishgan. Farzandlar nafaqat ota ishini davom ettirdi, balki yaxshi tarbiya olganligini odobi va axloqi bilan namoyon etmoqda.
Toshkent viloyatining soʻlim Parkent tumanida tavallud topgan. U. Umarov Toshkent shahar IIBB tizimining turli lavozimlarida qariyb 28 yil xizmat qildi. Tizimda faoliyat yuritish barobarida, ustozlaridan oʻrganganlarini koʻplab shogirdlariga oʻrgatib, sohaga oʻz hissasini qoʻshdi. Va nihoyat bosh boshqarma PPX va JTSB Ekologiya va tozalikni nazorat qilish batalyoni boʻlinma komandiri lavozimidan pensiyaga chiqdi.
Turmush oʻrtogʻi Mahluba aya bilan 4 oʻgʻil va bir qizni tarbiyalab voyaga yetkazishdi. Qizi Muxlisa hamshira, oʻgʻillar esa ota izidan ketib, yurtimiz tinchligi va osoyishtaligini taʼminlashda oʻz hissasini qoʻshishmoqda. Lekin hayot ekan. Usmonali aka 2019-yilda bu dunyoni tark etdi.
Oradan bir yil oʻtib, oʻgʻli Toshkent shahar IIBB YHXB YPX brigadasi 2-batalyon 3-safarbar guruhi YPX inspektori, katta serjant Salim Umarov ham harakat xavfsizligini taʼminlash maqsadida xizmat vazifasini olib borayotgan vaqtda vafot etib, Oʻzbekiston Respublikasi Prezidentining farmoniga binoan, “Jasorat” medali bilan mukofotlangan.
Otam ichki ishlar organi xodimi boʻlganligi uchun uyda kam boʻlar edi, deydi katta farzandi Toshkent shahar Yashnobod tumani IIOFMB JTSB PPX otryadi guruh komandiri, katta serjant Rahim Suyarov. Doim otamni kutib uxlab qolardik. Tong azon biz uygʻonmasimizdan ishga ketardi. Uyda bizlar koʻproq bobom, buvim va onam bilan qolardik.
Uchinchi oʻgʻil Sardor Umarov ham IIV Akademiyasi Serjantlar tarkibini tayyorlash oliy kurslarini tamomlab, Toshkent shahar IIBB PPX brigadasi maxsus batalyoni 2-otryadida xizmatini boshlaydi. Shu tariqa to 2020-yilga qadar patrul-post yoʻnalishida faoliyat olib boradi. Keyin Yashnobod tumani IIOFMB 1-sonli IIB M va FRBga oʻtkaziladi. Hozirda u Yashnobod tumani IIOFMB 3-sonli IIB Ichki migratsiya guruhi katta inspektori, unvoni katta serjant.
Eng kichik farzand Javlon Umarov mustaqillik tengdoshi. U ichki ishlar organlarida ishlamagan boʻlsa-da, shunga yaqin yoʻnalishda faoliyat olib bordi. U bir muddat Milliy gvardiya qoʻriqlash boʻlimida yollangan xodim sifatida nazoratchi lavozimida ishlagan.
Farzandlar ota kasbini tanlab kam boʻlishmadi. Hali Usmonali aka barpo etgan bogʻdagi daraxtlar koʻplab mevalar beradi, albatta. Uning yoqqan mashʼalasi hali uzoq yillar yorugʻlik taratib boraveradi.
Sarvar Sobirov, oʻz muxbirimiz. “Postda”
Toshkent shahri