Andijon viloyati IIB huzuridagi Tergov boshqarmasi va uning quyi boʻlinmalarida xizmat qilib kelayotgan xodimlar oʻrtasida “Eng yaxshi tergovchi” koʻrik-tanlovining viloyat bosqichi boʻlib oʻtdi
2024-08-28 09:00:00 / Yangiliklar
Ichki ishlar organlari xodimlarining kasbiy, xizmat, jangovar va jismoniy tayyorgarliklarini oshirish, bilim saviyasini oshirish maqsadida tez-tez nazariy va amaliy bellashuvlar hamda sport musobaqalari oʻtkazish anʼanaga aylangan.
Tanlov va musobaqalar asosida shaxsiy tarkib oʻrtasida sogʻlom raqobat muhitini shakllantirib, eng isteʼdodli va istiqbolli kadrlarni aniqlab, ragʻbatlantirish va qoʻshimcha ravishda qoʻllab-quvvatlash, shuningdek, maʼnaviy-maʼrifiy, jismoniy, jangovar, kasbiy tayyorgarlik faoliyatini tizimli ravishda tashkil etish orqali xodimlarni vatanparvarlik gʻoyalariga sadoqat, milliy va umuminsoniy qadriyatlarga hurmat ruhida tarbiyalash maqsadida Andijon viloyati ichki ishlar boshqarmasi huzuridagi Tergov boshqarmasi va uning quyi boʻlinmalari xodimlari oʻrtasida “Eng yaxshi tergovchi” koʻrik- tanlovining viloyat bosqichi boʻlib oʻtdi. Unda sohada xizmat qilayotgan tergovchilar va surishtiruvchilar ishtirok etishdi.
Dastlab, xodimlar turnikda tortilish, 100 va 3000 metrga yugurish hamda qoʻl jangi usullari boʻyicha sinovlarni topshirdilar.
Shuningdek, ishtirokchilar belgilangan soniyalar ichida «Kalashnikov“ avtomati va ”Makarov« pistoletini toʻliqsiz qismlarga ajratish va yigʻish amaliyotini bajarishdi.
Ular bilan oʻtkazilgan psixologik testda xodimlarning ruhiy holati va boshqa xislatlari oʻrganildi.
Koʻrik-tanlovda tergovchilarning nazariy bilimlarini sinash maqsadida test sinovlari ham olindi.
Bundan tashqari, yakuniy shartda esa ishtirokchilar qonunchilikka kiritilgan oʻzgartishlar boʻyicha ogʻzaki savol-javobda ishtirok etishdi.
Oʻzaro tajriba almashish va kasb mahoratini oshirishga yoʻgʻrilgan musobaqa gʻoliblari koʻrik tanlovning Respublika bosqichiga yoʻllanmani qoʻlga kiritdi.
Andijon viloyati IIB Axborot xizmati